Sanghal rual thi enfiah

Sanghal rual thi enfiah
Social media lama Tuiriala sanghal thi hmuh chungchang darh chu Kolasib honorary wildlife warden H Vanlalnghaka chuan AH & Vety department leh Environment Forest & CC department sawmin Thawhtanni khan a hmunah an en.
Thu an dawn danin, September 5 chawhnu dar 2 vel khan chakai chhit tura kal, Ramherliana Saipum khua chuan sanghal thi a hmu a, a hmuh lai hian uih tawh mah se, a la pum pual a, September 8-a a ruang hlawm tur an kal hi chuan a ruh bak hmuh tur a awm tawh lo. Tuna sanghal thi an hmuh hi hmunkhatah niin, sanghal 5 ruhro a ni a; a note pathum, a pa puitling sum 5 vel pakhat, a nu sum 5 vel tho pakhat ruhro a ni a, chinai nen sawngbawlin uluk taka phum a ni.
Sanghal rual ruang piahah hian a nu sum 6 vel hmuh a ni a, a ruang hi hlawm tur awm loin alo bo tawh. Hei bakah hian August thla tawp lam khan Mauchar, Tinghmun nena inkar Hmunte ramah sanghal thi 2 hmuh a ni tawh bawk a, hei erawh phum nghal a ni. Heng sanghal thi hi AH&Vety department chuan eng vanga thi nge tih hre turin a ruh test tur lak a ni.
Sanghal ruang hlawmtute hi Saipum YMA hruaitute leh VC ten an tawiawm a ni.