Santos-ah Neymar kirleh

Santos-ah Neymar kirleh
Kum 32 mi ni tawh chungin Neymar Junior chu rawlthar kum 17 mi lek ni chunga a career bul a tanna Brazil club lian leh lar Santos-ah Inrinni liamta khan a kir fel leh ta a, a chipuite hian nasa taka lawm chungin an lo hmuak.
Kan hriat tawh thin angin, Neymar hian a club hlui zawm leh turin hliam avanga a engmah lohna Saudi Arabian club Al-Hilal a chhuahsan a, amah bakah football legend Pele ngei pawhin hming a lo chher tawhna an ram club-ah a hun hnuhnung hmangliam turin a kir.
Santos club hian social media platform pakhat X lamah vide o tichhuakin, caption-ah ‘ThePrinceIsBack’ tih an dahchhuak kulh a; he boruakah hian Neymar pawh tawngchhuak ve nghalin, “King Pele, i hman turin ka rawn inpe a, lalthutthleng leh lallukhum chu i ta a la ni reng e, a chhan pawh chatuana nung reng i ni miau a,” a ti!
He thu sawi chung hian Santos-a Pele lo hak thin number 10 a rochun tur erawh jersey thianghlim bik a nih ang ngeiin a tan chawimawina a nih thu a sawi a, “King zahawmna leh he club leh khawvel tana a rochunte chawimawi chhunzawm zel turin ka theihtawp ka chhuah dawn tih erawh ka tiam e,” tiin Pele hak thin jersey number ha chunga nep viau a tum loh thu a tarlang tel!
Kum 2009 khan rawlthar kum 17 mi lek ni chungin Neymar hian Santos-ah a career a tan a, match 225 a khelh atanga goal 136 thun tlingin, kum 2011 khan kum 50 dawn thuak hnua a vawikhatna atan Santis chu South America khawmualpuia club inelna sang ber Copa Libertadores-ah a champion-pui nghe nghe.
Kum 2013-ah Barcelona zawmin, chu mi August 2017 khan tun thlenga world record fee ni zui zel turin Paris St Germain chuan euro maktaduai 222 tehrengin an senglut ta a ni.
PSG atang chuan August 2023 khan sum ngah Arab team Al-Hilal chuan an leichhuak a, Saudi club a zawmna tak hi official-a hmuh tur awm lo mah se euro maktaduai 90 (USD 98 million) vel ni turin media lamin an tarlang a; beiseina sang taknen senglut bawk mah se Arab-ho chuan hliam avangin Brazilian star hi game sarih bak an chhawr hman ta lo!