Savage X Fenty CEO nihna atangin Rihanna a chawl

Savage X Fenty CEO nihna atangin Rihanna a chawl
Rihanna chuan a lingerie brand Savage X Fenty CEO a nihna a bansan a, CEO thar atan Anthropologie Group CEO hlui Hillary Super an lalut nghal. Hillary hi apparel company hrang hrang Guess, American Eagle leh Gap-ah te pawh hnuhma lo nei nual tawh a ni. Vogue Business-in a tarlan danin Rihanna hi Savage X Fenty-ah hian executive chairman a la ni dawn tho a ni.
CEO atana Hillary Super an lakluh hian Sacage X Fenty hian hma a sawn ngei an ring a, Wall Street lamah pawh ngaihven an hlawh lehzual an ring a ni. An company hian nikum khan anmahni pualin dollar maktaduai 125 an khawl ngah thei a, funding dollar maktaduai 310 an hmu thei bawk. Tunah hian Savage X Fenty hlutna hi dollar tluklehdingawn 3 niin an chhut a, he company avang hian Rihanna hausakna pawh dollar tluklehdingawn 1.7 angin Forbes chuan an chhut a, entertainment khawvelah hmeichhe zingah Oprah Winfrey dawtin, hausa ber dawttu a ni pha hial a ni.
Savage X Fenty hian kumin May thla khan an kum 5 tlin champha an lawm ve chauh a, chuti chung chuan an thang chak hle a, a neitu hi Rihanna bakah investor thenkhat an ni a, chung zingah chuan LVMH leh Jay-Z hnuaia Marcy Venture Partners te pawh an tel. Online store bakah Las Vegas, Houston, Los Angeles, Atlanta, Philadelphia, Garden City, New York leh Arlington-ah te dawr an nei bawk a ni.
Rihanna hian Savage X Fenty hi a chawi lar thiam hle a, he brand hian television show pawh Amazon Prime Video nen tangkawpin pali an siam tawh a, heng video-a an product tihlan te chu an show thlirtu ten an lei nghal zel thei. Hei bakah hian football-theme collection pawh kumin February thlaa Super Bowl LVII half time show-a Rihanna perform hma lawk khan an tichhuak a, he half time show hian US-ah ringawt pawh thlirtu maktaduai 118.7 neiin, Super Bowl half time show neih tawh a entu ngah ber a la ni.