Sawhthing – ling bawk, cho bawk

Sawhthing chawh hun a ni tawh lo a, hralh hun pawh a ni tawh lo. An ling tawh a, mahse loh theih loh avanga chawh a la ngai, an la hralh bawk.Sawhthing hi January-ah an cho tan thin a, a hralh hun pawh a intan nghal thin. April thla tir atangin an ling thin a, kuminah pawh sawhthing hmun neite’n an ling tawh. Mahse chawh a la ngai a, an chawh sa hralh a la ngai.
April ni 20-ah khan sawhthing ngah khua Chhiahtlangah chuan sawhthing hmun pakhatah hian sawhthing an ling mawlh mawlh a, a thlangah mi dangin sawhthing hralh tur a hmun atangin an lo thiar chhuak ve thung.
Sawhthing thiartute chuan an hloh nasat thu an sawi a, an chawhna a rei tawh avangin an sawhthing a zang tawh tih an sawi. An chawh hlima quintal 12 kha an hralh chuan quintal 8 vel a lo nih tawh lai te pawh a awm thu an sawi a, tunah a chawh hun ni tawh lo mah se hralh an duh avangin April thla tirah an cho leh a, a lo zang leh hman a, bag 1 kg 2 velin a zang hman an ti.
Chutiang harsatna chu hmun dangah pawh an tawk a, an chawh tirhah an hralh nghal loh avanga zang ta sawt hi hmun hrang hrangah sawi tur a awm.
Sorkar thu ang chuan sawhthing hi February ni 2-a lei tan tur a ni a, February ni 9-ah an lei tan. A neitute’n an cho a, mahse an chawh ruala lei a nih loh avangin a lo zan hman thin bakah a hmel mawi lo pawh a awm hman thin tih an sawi. May thla tawp thlenga lei tur a ni a, May thlaah, sawhthing tiak a awm hnuah chawh a la ngaih dawn bakah, chutiang huna cho lo, a hmaa lo cho sa an awm a nih chuan a zang leh hman dawn tih chu a hmun neite sawi dan a ni.