Sawhthing man chingpen leh a behbawm…

Tun hnai khan agriculture minister chuan thuthar thehdarhtute hnenah, sawrkar ruahman ang ni loa sawhthing lei leh hralhnaa thil tihchingpen cheng vaibelchhe 4/5 hu vel a awm tih a sawi a; hemi chinfel hma chuan support price pek chhuah theih a la ni lo tih sawiin, tun thlenga sawhthing support price cheng vaibelchhe 118 chuang pek chhuah a nih tawh thu leh, pek hmabak cheng vaibelchhe 21 hu vel a la awm thu a sawi bawk.
Sawhthing man tihchingpen hi Champhai district-a secondary collection centre(SCC)-ah a hluar zual nia sawi a ni a. Myanmar atanga sawhthing phurh luh, tualchhung sawhthing anga sawngbawl chu SCC-a lo buaipuitute nen inthurualin tualchhung thar angin lei a ni a, society-a inziaklut turin Adhaar card thlengin an lo nei thei a, a tirah hriatchhuah nghal ni lo mah se, social audit atangin hriat chhuah a ni ta a. Sawhthing lei tawh ni si, lei nawn ang chi pawh a awm a ni awm e. Hmun danga a chingpen dan hi tarlan a ni lo.
He thil thleng atanga lang chiang tak pakhat chu, system fel tak anga langte pawh hi, system kengkawhtute an inthurual them theih zel chuan, dik lo pawh dik angin a lang zel mai, tih hi a ni.
Sawhthing chungchanga thil chingpen dan hi social audit atangin hmuhchhuah a ni a, chu chu a changtu minister-in a puangzar a. Hetianga puanzar a nih tawh chuan, eng tin nge chinfel a nih zui tak tih leh, eng action nge lak a nih tih hi mipui hriat tura a changtu minister emaw, a kaihhnawih official-ten emaw an puanzar leh ngei hi mipui pawhin an beisei leh thlir ber tur pakhat a nih a rinawm.
Hetiang anga thil chingpen hi a tam hle a, hei hi Mizoramin kan tawrh mek, kan vei mek, kan buaipui mek, ram hmasawnna tithuanawptu mai ni lova, mi harsa zawkte chan-ai chhuhsakna leh retheihna thlentu a ni. Hei hi a khaikhawmna tawngkam lar tak a awm a, chu chu ‘Corruption/hlemhletna’ tih a ni. Sawrkar department hrang hrang hnathawh dan, sum hman dan etc. endiktu ‘Comptroller and Aditor General of India’ chuan kum tin report a siam a, chutah chuan department thenkhat sum tihchingpen dan te, system kalha thil kal dan te pholan a ni thin. Chu chu Mizoram Legislative Assembly hnuaia committee peng hrang hrang PAC te, Subject Committee etc. ten bawhzuiin an chhui zui ve thin a; mahse, sawrkarin a tawp a thlenpui tak dan hi mipui lam chuan kan hre pha tawh ngai lo; thenkhat chu action lak awm mumal lova zuzi ral ta mai mai te pawh a awm thin. Hetiang kal dan system hian dik lo taka thil ti duhte a ti-hlu-hlang mai niin a lang.
Sawhthing neitute leh SCC-a a lo buaipuitute an inthurual thei ang tho hian, sawrkar department-a thawktu thenkhat, hlemhletna thila thurualpui theih an tam avanga Mizoram pawh hi hma sawn chak thei lo kan nih a rinawm. Sawhthing chauh lo, thil dang dik lo pawh hi kan minister-te hian puangzar zel sela kan thatpui phian maithei a ni!