Sawhthing sawngbawl turin inrem

Sawhthing sawngbawl turin inrem
Opikpure Pvt. Ltd. leh Mizoram sawrkar chuan Champhai district Khuanglenga sawhthing sawngbawlna, ‘Ginger Processing Unit’ dinna tur thawhdunna thuthlung an ziak.
Mizoram sawrkar leh Opikpure Pvt.Ltd. in thuthlung an siam hi industrial estate hmun, Khuanglengah kum 10 chhung sawhthing sawngbawlna din leh kalpuina tur a ni a. Hemi atan hian Opikpure Pvt.Ltd chuan industrial estate ram chu sawrkar bituk rate angin, man chawiin an luah hawh dawn bakah thawktu zaa 50 aia tlem lo state chhung mi an ruai dawn a ni. An inbunna tur senso hi cheng vaibelchhe 2.5 vel a ni a, 2026 kumtir lamah hna thawk tan tura inbunfel hman an tum tih an sawi.
MoU ziahnaah hian Opikpure Pvt.Ltd. managing director chuan an ruahmanna thenkhat a sawi a. Ni zung chakna hmanga sawhthing pho rona tur khawl engemawzat an hmang dawn. Nikhatah sawhthing metric ton 20 an tih ro theih tur thu a sawi a. Organic product, thlai hlo mihring hriselna atana pawi thei tel loa thar chhuah hi man man zawka hralh thin a nih avangin he hmalakna hian kuthnathawktute hnenah organic farming uar zawka kalpuina a thlen an beisei tih a sawi a ni.
Chutianga thar chhuah thlai chu organic certification an buaipui sak anga, sawhthing chauh ni lo, thei leh thlai dang pawh sawngbawl tel an tum tih a sawi a. He hmalakna hian thalaite tan eizawnna a siam belh bakah thlai tharte man man zawkin a tih ral theih phah an beisei tih a sawi bawk.