Sawi ho…. reng mai!

Nimin khan, ATI Auditorium, MINECO-ah, Bharat Rural Livelihoods Foundation, Rural Development Department, Govt. of Mizoram, United Nations Development Programme leh Mizoram University te huaihawtin, ram leilung tichhe lo zawnga hmasawnna tluantling kalpui dan tur chungchang te, industry changtlung zawk din dan tur te, tlang rama loneitute harsatna hrang hrang – tuihna lo tlem tial tial te, market lama harsatnate leh sik leh sa inthlakin a nghawng harsatna chungchangte sawi ho a ni a.
Sawi ho hi thil tul tak a ni a, sawi ho atangin hmalak dan tur tha zawkte pawh a lo chhuak thin. Thufingah pawh, ‘beih hmain ngun taka râl rêl a tha, rem i hriat poh leh i chak zâwk ang’ tih a awm nghe nghe hi.
Chutih rual erawh chuan, kan sawi ho tam tawh dan ngaihtuahin changkang/hmasawn viau tawh awm tak hi kan ni a, mahse ‘kan la chuti khati…’ tih hi a la ni deuh reng mai!
Tuna sawi hona hun pawimawh takah pawh hian, sawi ho avanga hma kan sawn duak duak tawhzia lam aiin, hmasawnna tur kan la ngahzia lam a ri ring zawk niin a lang. Chawhrualin India ramah hactare khatah lo neitute’n 2.5-3 tonnes an thar laiin, Mizoramah chuan hactare khatah 1.73 tonnes chauh an la thar chhuak a. Loneitu, forestry leh fisheries te tharchhuah belhkhawm hi state gross value-added ah 27% chauh niin, service sector atangin 46% a ni thung, tih te tarlan a ni.
Sawi hona atanga data/statistic kan hmuh ang hi chuan, Mizoramah hian kuthnathawka eizawngte hi 60-65% an ni a. Hei hi economic sector pathum zinga a hmasa ber primary sector (agriculture, forestry, mining, fishing etc.) hnuaia awm niin, service sector thawhchhuah hi 46% a nih chuan, secondary sector (manufacturing, construction etc.) thawhchhuah chu 27% a ni tihna a ni. Hetia han ngaih mai chuan, 60-65% te hi thawk chhuak tam ber tur niawm tak an ni a, mahse an ni si lo.
Seminar, workshop, sensitization, orientation, symposium etc. te hi a pawimawh a, hmasawnna tura rahbi pawimawh tak chu a ni ngei mai; kan sawi ho tam tawh dan ngaihtuah hi chuan, hma hi sawn viau tawh awm tak kan nih laiin, hma kan la sawn viau thei tlat lo mai hi ‘engtin nge kan sawi ho leh ang?’