Sawrkar hnathawk chhawr tlak loh dan anga chhuahtir mai tha kan ti – Chief minister

Sawrkar hnathawk chhawr tlak loh
dan anga chhuahtir mai tha kan ti
– Chief minister
Sawrkar hnathawk quality tha neih tuma hma laknaah sawrkar hnathawk, chhawr tlak si loh an kawlte dan ang taka chhuahtir mai tha an tih thu chief minister Lalduhoma chuan a sawi.
Thawhlehni khan chief minister ho hian School Education department hmalakna thlirlet a ni a. Thil dik lo zawng hrim hrima buatsaih an ni loa, dinhmun dik tak leh hnathawh dan hriatchian an duh ber a ni a, a tul angin thil fel lo awmte sawiho zel a duh tih a sawi.
Department tinah Service Review Committee din tura an tih thu sawiin, “Sawrkar hnathawk, chhawr tlak si loh kan kawlte dan ang taka chhuahtir mai tha kan ti a. Sawrkar hnathawk quality tha neih kan tum tlat a ni,” a ti.
Central fund dap kawngah state share percent sang chi chu pumpelh hram hram an duh avangin department-ten central-a thehluh tur project an neih reng reng Planning department kaltlang zela thehluh tur a ni tih chief minister hian a sawi a. Chu chuan project inthuah awm thei a veng bawk dawn tih a sawi a ni.
Corporate social responsibility (CSR) hi tunhma chuan a sawi chhuak thiam thiamin an sawi chhuak a, an duh dan danin an hmang zui leh mai niin a ngaih theih. Awmze nei zawkin ram tan tangkai takin a hman theih a, CSR hi CM office atangin kan centralise a, department tinin CSR dap zelin, CSR Cell hriatpuinaa kal erawh a ngai dawn tih a sawi a ni.
Project Monitoring Committee-in project thawh mek 40 vel an endik tawh a, siamthat ngai an hmu thin tih Lalduhoma hian sawiin, “Kan sawrkar ve chin atang hi chuan project kan thawh hi a nihna tur ang taka thawh leh bawhzui nise kan duh a, kan khauh dawn,” a ti.
Review meeting hi CM office atangin minute ziah thin a ni a, minute bawhzui that dan rang taka lo hriat leh an duh thin tih a sawi. Hmasawnna hna thawh thuai thuai an duh a. Sawrkar hnathawkten office hour piah thlenga hnathawh hreh lo turin a chah.
“Central Secretariat ka zu tlawh foa, an peon file kengte thlengin an kal hne hne ngai lo. Zan dar 8 thlenga office-a awm hi kalphung nghet ang maiin an nei a, over time allowance an phut pawh kan hre hran lo. Kan ram tan kan thawk a, inpe ang u,” a ti.
School Education department hmalakna hi minister Dr Vanlalthlana’n khaikhawmin presentation a pe a. Chumi hnuah sawiho tur chhawp chhuakin zawhna awmte chhan a ni.