Sawrkar hnathawkte leh a behbawm…

Mamit Hqrs MZP chuan Mamit khawpui chhunga sawrkar pisa hrang hranga thawk te, pisa kai hun chhungin dawr tur an awm mumal lo thin tih thu an dawng a; Thawhtanni leh Zirtawpniah a nasa zual niin an sawi a. Office-a thawkte dawr nuam lo an awm thin nia sawi pawh a tul anga bawhzui an tum tih MZP hian an sawi bawk.
Hetianga sawrkar pisaa thawktute awm dan hriattur a lo awm ta mai hi ‘thilmak’ tak a ni a, a awihawm lo rum rum zawk hial awm e.
Sawrkar hnathawkte hi, dawrtu pawh an neih tam loh changa office chhuahsan mai tur an ni lo a, sawrkarin ni khata hnathawh hun chhung darkar zat a bituk chhung chu office-ah an awm tur a ni a, dawrtu an awm hun hunah an lo buaipui nghal zung zung thei tur a ni. Chutianga hna thawk tura sawrkarin mipui sum hmanga hlawh tha tak neia a rawihte an ni a, mipui mamawhna lo phuhruk sak a, chumi atana official thil pawimawh buaipui chhunzawm chu englai pawha an hna a ni. Chutiang hna thawk tura sawrkar hnena dila hmu chu an ni a, an dil ang hna thawk tura lak ni si, an thawk leh duh lo emaw, an thawk leh peih lo emaw a nih chuan, an chungah action lak theih a ni.
Thil lungchhiatthlak leh deuh mai pakhat chu, dawr theiha office-a awmte zingah pawh dawr nuam lo tia sawi tur an lo awm lehzel hi a ni awm e. Mihring mize inang lo tak tak kan ni a, thinchhe deuh te, zaidam deuh te, tawng duh tak te, tawngmawh tak te, tawngka vin tak te, aw zaidam tak te etc… kan ni nuai hlawm a. Heng kan ze hrang hrangte hi a nihna ang anga khawi hmunah pawh, englai pawha kan lanchhuahtir reng chuan, midang nena kan inkar a khi vat a, vui leh vaina a lo chhuak a, a lo buai phah ta thin a ni.
Sawrkar hnathawkte hi chuan zia an thup tthiam tur a ni a, hna an thawh chhan anmahni dawrtu mipuite tanpui leh mamawh phuhruksak hi an hna lian ber a ni mai awm e.
Chutih laia, an hnathawh tur ber tlansan a, office atanga chhuah bo daih chu a kawnghmang lo hle a, nikhata hnathawh hun chhung darkar zat an awm peih lo a nih chuan hna thawk tlak lo, disqualify tur tihna a ni mai awm e. Sawrkar hnathawk tam tak hian an hnathawh chhan hi an hrechiang lo thin a, hei hi thuneitu sang zawk ten vei se, intuaithar dan ngaihtuah thin se a duhawm hle a ni.