Sawrkar kum kal mekah Taxation-in vbch.922 lalut

Sawrkar kum kal mekah kumin January thleng khan Taxation department chuan chhiah cheng nuai 922 an lakhawm tawh.
Thawhlehni khan Taxation minister Dr Vanlalthlana hoin department officer leh staff-ten inrawnkhawm an huaihawt a. Heta report danin, kum 2023- 2024 chhunga Mizoram sawrkarin target a tuk (budget estimate-BE) chu cheng vaibelchhe 1000 a ni a, chu chu state-in ama puala chhiah atanga sum a lakluh ve nuai 1084.29 (BE) atanga chhutin zaa 92.22 a ni. Hei hian Taxation department-ah Mizoram sawrkar a innghat thuk hle tih a lantir a. Sawrkar kum kal mekah kumin January thleng khan vbch. 922.83 an lakhawm tawh a; thla 10 chhungin thlatin vbch. 92.28 lalut zel ang an ni.
Taxation minister chuan an department chu state sawrkar tan revenue laluttu pawimawh ber pakhat a ni tih sawiin, department officer leh staff ten theihtawp chhuaha Mizoram tana thawk turin a fuih a. Hmalak dan tur leh a ngaihpawimawh zawng sawiin, “Chhiah hi ram mipui enkawlna tura sawrkarin a lak a ni a, chhiah lakkhawm pung chho zel hian ram hmasawnna a keng tel,” a ti.
Nasa lehzuala chhiah pawimawhna mipui hnena hrilh turin department hotute a chah a. Chhiah petuten awlsam taka chhiah an pek theihna tur hmanrua, a bikin computer leh internet hmanga department-in project hrang hrang a kalpui chu tichangtlung turin hma lak tum mek a ni tih a sawi.