Sawrkar lai thawhpui thei tur AMC kan thlan a ngai – Lalduhoma

On Mar 31, 2026 1 0

Sawrkar lai thawhpui thei
tur AMC kan thlan a ngai
– Lalduhoma
Kalphung tharah state-a sawrkar lai thawhpui thei tur Aizawl Municipal Corporation-ah thlan an ngai a, AMC tha zawk tih chu an auhla tur a ni tih ZPM hruaitu Lalduhoma chuan a sawi.
Thawhtannia an party office-a inkhawmah ZPM leader Lalduhoma chuan, AMC-a MNF sawrkarah Solid Waste Management Centre Tuiriala bawlhhlawh paihna tur siamnan AMC-in JCB (excavator) 3 nei sa reng siin mimal JCB hawhin cheng vaibelchhe 26 an seng chu thil mak tak a ni tih a sawi.
SIPMIU-in a thlawna AMC hnena tipper 50 leh pik up 4 a pek, October 2022-a an neih chu a kum lehah hralh an duh a. Cheng nuai 24 chuanga an neih kha cheng nuai 5 awrhin an hralh tih a sawi. AMC Sports Complex Bawngkawna hna inpek thlengin thil dik tawk lo tam tak a awm nia a lan thu sawiin, “Mizoram khawpui berah kalphung hlui kaihhruai sawrkar AMC a la ding hi, kalphung tharah chuan sawrkar lai thawhpui thei tur AMC kan thlan a ngai a, AMC tha zawk tih hi kan auhla a ni,” a ti.
AMC hnuaia ULB grant 2024- 2025 khan cheng nuai 2976 an nawrchhuak a. Hei hi AMC-in a ngawihbo pui veng veng a, kumin March 18 khan an hrechhuak chauh tih chief minister Lalduhoma hian a sawi a. MNF AMC-in Aizawl an lo vei lo hle tih a sawi.
“A lapse lohnan nuai 2876.88 kan haichhuak leh hman a, nikum hmasa ami kan haichhuak a, tun amite kutah a lut a, tunah kan hmang thei dawn ta chauh a ni. 2025- 2026 grant nawrchhuah leh a ngai a, nuai 3053.20 lapse tur a awm. Tun ni hnih lek la awm chhung hian nawrchhuah kan tum leh mek. Ngaihsak loh avanga hetianga a liam ringawt tur hi kan ui a, theihtawp kan chhuah,” a ti.
Delhi malsawmna Pathianin a pe tih chief minister hian a sawi a. Tuna Mizoram leibat zat chu SASCI avangtein a lang tam lo thei lo mai niloin a lan tam hi an duh zawk tih a sawi.
Sawrkar hmasaah RLB grant, VC-te chan tur 2021- 2022 chhunga 1st installment nuai 3450 an haichhuah bak an haichhuak tawh loa, an sawrkar hnuah khawtin hmasawnna tur an ngaihpawimawh avangin 2021- 2022 2nd instalment atanga sawrkar kum kal meka hman tur nuai 36200 an haichhuak a, heng zawng zawng hi VC-te kutah a lut vek dawn tih a sawi. MNF hunlaia VC-te dawn tur kha ZMP sawrkar hnuaiah VC-ten a double-in an dawng dawn tih a sawi a ni.