Sawrkar school pahnih sakthat dan tur minister hoin enfiah

Sawrkar laipui Ministry of Tribal Affairs-in Article 275 (I) hnuaia grant a pek hmanga school sakthat tur Govt. Tuikual North Middle School leh Vaivakawn High School chu Thawhlehni khan bialtu MLA, minister Lalruatkima’n a tlawh a. Aizawl deputy mayor R. Thanglura, School Education Dept hotute leh khawtlang hruaitu ten tawiawmin, school enkawltute nen sakthat dan tur an sawiho.
Minister chuan a bial chhunga school pahnih sakthat a ni tur chu lawmawm a tih thu leh sum awmte tangkai taka hman a nih a beisei thu a sawi a. Hna tha, tlo leh mawi a awm theihna’n khawtlang hruaitute leh school thuneitute thawhpuina a ngen. Leilung malsawmna fur ruahtui dawnte khawlkhawm a tul, tiin, school sakthatna turah pawh ruahtui khawl ngaihpawimawh nise a duh tih a sawi.
Aizawl mayor R Thanglura pawhin school sakthat chu khawtlang tan pawha chhenfakawm leh chhawrhnaawm tak a nih a beisei thu a sawi. Sawrkar school-te hmasawnna chu zirtirtute kutah engemaw chen a innghat a ni, tiin, zirlaite an enkawlnaah thahnemngai deuh deuh turin a chah.
Govt. Tuikual North Middle School hi kum 1970 khan din a ni a, tunah zirlai 43 awmin zirtirtu 11 an awm. Vaivakawn High School hi kum 1992-a din niin, zirlai 30 an awm mek. Tuikual North M/S sakthatna’n hian cheng nuai 60 ruahman niin, Vaivakawn HS tan nuai 70 ruahman a ni.