Sawrkar thara hna lakah party induhsakna awm lo – Deputy speaker

Sawrkar thara hna lakah
party induhsakna awm lo
– Deputy speaker
ZPM sawrkar hnuaia hna lakah party induhsakna a awm loa, a thiam leh tha apiang lak an ni tih deputy speaker Lalfamkima chuan a sawi.
MYC Coaching Centre building Kolasib-a Mizoram Youth Commission Coaching Centre Kolasib 2024 Session Nilainia a hawnnaah Kolasib bialtu MLA ni bawk Lalfamkima chuan sawrkar thara hna lak chungchangah party induhsakna a awm loa, a thiam leh tha apiang lak an ni a, chuvangin thiamna nei tak takte tan zau zawkin hun a inhawng zel tih a sawi. Hlawhtling tur chuan tih tak takna a pawimawh tih a sawi bawk.
Kolasib tan thahnemngai takin MYC Coaching Centre an neih theih nan hma a lo lak tawh dan a sawi a. Kolasib district thalaiten competitive exam an hmachhawn a ngai, tiin, an hlawhtlin loh chhan chu an thiam loh vang ai mahin, rualawhna leh midang elna nei loa competition an hmachhawn thin vang ni zawka a lan thu a sawi a ni.
DRDO Kolasib project director Lalmuan Puia chuan UPSC leh MPSC exam a lo beih tawha a tawnhriatte zirlai admission titharte hnenah sawipuiin, exam inpuahchah dan leh khawtlanga inhman dan tawk hriat a tul tih a sawi.
MJA, Kolasib District president Andrew Vanlalauva pawhin kum 2021-a hawn tawh MYC Kolasib Centre chu Kolasib thalaiten an hmang tangkai tawk lo tih a sawi a. Sawrkarin thahnem a ngaihna chu thalai, hna zawng mekten thahnemngai tak leh tih tak takna nena hma laa an chhunzawm a ngai, tiin, an district-in Mizoram pum huap hna inchuhnaah tam zawk an tlin zel a tul tih a sawi a ni.
Kolasib MYC Coaching Centre-ah hian coordinator Lalnunhlua, LDC pakhat leh peon pakhat awmin, Dr Lallianzuali Chhangte (History) & Vanlalmalsawma (Economics), Govt Kolasib College ve ve; Zoremmuana Ralte (Economics) (DRO Kolasib) te chu faculty an ni a. September – December 2024 Session chhunga zir turin admission ti zirlai 10 an awm a ni.