Sawrkar tharah PC tel an tum Labour leh Industries chan tum

Kumin MLA inthlanah sawrkar lama tel ngei an inring a, an economic policy tihhlawhtlinna atan Labour department leh Industries department hauh an tum tih PC senior vice president Lalrinzuala Chawngthu chuan a sawi.
PC hruaitute chuan Thawhtanni zan khan Mizoram Mistiri Association (MMA) Gen Hqrs office an tlawh a. Party senior vice president hian an economic policy-ah Mizoram Employment Guarantee Act siama hna zawng zawng awmze neia kalpui a, innghahna tlaka siam an tum tih sawiin, “Worker’s agency din a, chumi kaltlang veka ziaka inremna nen thlapa inchhawr, thiam dan azira grade siam, labour court din, insurance hmanga hamthatna inpek, hunbi neia chawlh hun siamsak, hna nei lo chhawmdawlna pek, Mizorama hnathawktute humhim leh khuahkhirhte hi kan ngaihpawimawh avangin kan dah,” a ti.
In sak leh a kaihhnawiha eizawngten Workers’ Welfare Board-ah tun aia awlsama an inziahluh theihna’n district headquarters-ah office la nei loten nei thuai se, thingtlang kilkhawr zawkte tan sawrkarin ruahmanna siamsak se an duh tih a sawi bawk.
Kumin inthlanpuiah hian a sawrkar lama an tel ngei an inring a. An party economic policy ‘Khawl hnuh hmasawnna: mitin tan in leh hna’ tihhlawhtlin nan Labour department leh Industries department hauh an tum nghe nghe, tih Lalrinzuala Chawngthu hian a sawi a. “Kuthnathawkte, kutthemthiamte leh inhlawhfaten zah an kai a, hna hniam leh sang thliar loa eng hna pawh hna zahawma kan pawm theihna’n helama eizawngte dinhmun a that a ngai a, inchhawr dan phungah pawh inremna ziah thlap a tul. Kutthemthiamna hna hi eizawnna zahawm, mi nazawng tih ve theih loh a nih avangin hna sang leh zahawm tak a ni sa a, an ding chhuak ngei tur a ni,” a ti.
MMA president C Lalchawiliana sawi danin, an association hi sawrkar hriatpui thlap, sawrkara inziaklut an ni a. Mizorama political party thenkhat an hmu tawh a, an party policy-ah kutthemthiamte hamthatna tur telh turin an ngen a ni. MBOCW Board-ah member an nih angin in sak leh a kaihhnawiha eizawng tak takten hamthatna an dawn theihna’n an thawk thin a ni.