Siaha-ah thalaite tan Job Fair nei

Labour, Employment, Skill Development and Entrepreneurship (LESDE) department bultumin Siaha-ah District Job Fair huaihawt a ni.
Job Fair hawngtu LESDE minister Lalchhandama Ralte chuan an department-in hnathawktute leh thalai hna zawng mekte tan kawng hrang hrangin nasa takin hma a la a. Kumin May 9 &10 khan Mizoram Mega Job Fair chu Aizawlah neih niin, thalai 200 velin ramchhung leh rampawnah hna an hmuh phah tih a sawi a ni.
District level-a a hmasa ber turin Siaha district-ah Job Fair hi buatsaih zui a ni tih sawiin, thalai hna nei lo leh zawng mekte tan an tualcharah ngei hna interview theihna LESDE-in a hun sak chu hmang tangkai turin a chah. “Siaha district thalai tam takin ram chhung leh ram pawnah te hna tha tak hmu u la, ti hi kan duh ber a ni,” a ti.
Job Fair-ah hian automobiles company lian leh multinational company – Yamaha, Suzuki, Honda, Tata Motors leh Mahindra bakah HDFC Bank, LIC of India, Jay Jay Transport & Placement Solution leh Beer Seba Group of Institution ten stall siamin an inphochhuak a ni.
Job Fair neih rual hian mahni kutke hmanga eizawngtute hamthatna scheme hrang hrang heng – E-SHRAM, PM-SYM, NPS Traders, EMPEX leh MBOCWWB-a inziaklut duh ten awlsam taka registration an tih theihna’n stall siam a ni bawk.
Heng bakah hian Career Counselling Counter siam a ni a, hetah hian hna chungchang leh thildang hriatchian duh neiten an duh zawng an zawt thei a ni.