Sawrkar tirha minus kha kan plus tawh – Chief minister

An sawrkar tirhin RBI balance cheng vaibelchhe 300 chuanga an minus chu sawrkar kumthar chuankai chiah khan vbch. 500 chuangin an plus hman tih chief minister Lalduhoma chuan a sawi.Assembly Session-a thu a sawinaah finance changtu chief minister chuan sawrkarin leiba a ngah si a, an policy duante an kalpui thei tak tak dawn em ni, tia House member-ten an zawhna a chhang a. An sawrkar tirhin leiba vaibelchhe 13584 an chhawm a, an theih theih an inrul fel a, chuti maia rulh zawh theih chi erawh a ni lo tih a sawi.
An sawrkar tirhin RBI balance minus vaibelchhe 398 an nei a, theihtawpin tan an la a, sawrkar kum tawp a ral hnu, April 1 khan minus atangin plus vbch. 520 ah an chho hman tih a sawi a ni.
Hetihlai hian ziaka chief minister-in zawhna a chhannaah sawrkar thar lakluh ni, 2023 December 8 atanga kumin June inkarah Mizoram sawrkarin cheng vbch. 909.85 a puk tawh a; a pukna hi – Open Market Borrowing (OMB), National Bank for Agriculture and Rural Development (NABARD), Externally Aided Project (EAP) atangin leh Scheme for Special Assistance to States for Capital Investment (SASCI) atangin a ni tih a sawi.
Chief minister chuan sum puk thin chu state sawrkar sum indaihlohna hrang hrang leh revenue expenditure leh leiba rulh mek nan hman thin a ni tih a sawi.
“Puk lo chuan tumah kan awm thei lo. Puk tura pass tlan vek tawh kan puk a, thil thar anga sawi vak tur a ni lo. Thil danglam erawh, sawrkar hmasaa ways and means-in kum khat chhunga vaibelchhe 1000 lak tumin an dah chu, keini chuan nuai 3 lak kan tum. Kan rulh ve zel thin chhiar tel loin kan puk zat chiah an chhiar thin a, ways and means ah hian puk zat a lang tam ta a ni,” a ti.