SC-in ED te a hau

Supreme Court chuan Enforcement Directorate (ED) chu Chhattisgarh sorkarin central agency chu State-a Chief Minister Bhupesh Baghel, money laundering case Rs 2,000 crore liquor scam-a ‘mawhpuh’ tuma chet la vel tia a sawi hnuah ‘hlauhna boruak’ state-ah tuh lo turin a ti.
Bench of Justics Sanjay Kishan Kaul leh Ahsanuddin Amanullah te chuan ‘bona fide cause’ pawh ni se law enforcemnet agency te chet dan chuan hlauhthawnna boruak siamin rinhlelh tirin a awm zo vek thei a ti a.
Senior advocate Kapil Sibal, Chhattisgarh aiawha ding chuan investigation ED tena an neih laiin state excise department officials 50 chuang te chuan ‘rilru leh taksa lamah nghaisak’ an tawk tiin a sawi a.
“Thil duhawm lo tak a thleng mek a, ED te hi an sapatal a ni. Excise officer te an vau a ni,” tiin Sibal chuan a sawi a. State Assembly inthlan chu kum 2023 hian neih tur a ni a, hei vang hian an che na a ni tiin a sawi bawk.
Additional Solicitor General S.V. Raju thung chuan ED te chuan an tihtur dik tak an ti a, State-a scam an chhui chiang a ni, a ti ve thung.
State chuan ngenna an thehluhah, “Department of Excise a officer 52 te chuan ziakin taksa leh rilru thlenga Enforcement Directorate tena investigation neih laia an nghaisakna an ziak lang a ni,” an ti a. Chhattisgarh chuan ‘dinhmun duhawm lo taka dingin State investigative agency te leh Central agency te chet lak dan inmil lo chuan Centre-State intihbuaina a thlen thei’ a ti bawk.
State chuan officer thahnem tak te chu an chhungte pawh ED chuan an hmaih lo an ti bawk a. Chung an chhungte pawh chu ‘physically abused niin leh pre-typed document ah emaw blank page-ah hming ziah tir te an tum’ tiin tarlan a ni bawk a. Liquor scam case-a petitioner pakhat chuan Special Judge, PMLA (prevention of Money Laundering Act) hnenah ‘mawhphurtu chu Chief Minister a ni tia sawi tura vuakin a awm’ tiin a sawi bawk.
State chuan phek 140-a chhah ngenna an siamah ED te chet lakna avangin dan leh hrai lekkawhna lamah harsatna awm phah an ti bawk a. ED te chet lak vangin administration kalpui hleih theih a ni lo an ti bawk a. “ED te chet dan hi ruahmanna mumal leh fel sa tak State sorkar tibuai tura kalpui a ni a. Hei vang hian Chhattisgarh State chuan Supreme Court-a zualko mai bak tihtheih a nei lo” tiin tarlan a ni bawk.
State chuan ED tena investigation an neih chu an thuneihna piah lam leh dan kalh a ni an ti bawk a. “Enforcement Directorate tena chhui chianna an kalpui hi dan kalh a ni a, principle of federalism kalh a ni a, chu chu Constitution basic structure a ni bawk,” tiin an tarlang bawk a.
Chhattisgarh hian tun hnaiah Article 131 hnuaia Prevention of Money Laundering Act, 2002 chu hlih a nih theih nan original suit a theh lut a. State chuan he provision hi Central agency te chuan non-BJP state sorkar te tihbuai leh vau nan an hmang an ti a ni.