School bag ti zangkhai tura tihna zawm a nih dan enzui

School bag ti zangkhai tura
tihna zawm a nih dan enzui
Lunglei district thuneituten an district huamchhunga school naupangte bag ak rit lutukin harsatna a siamsak loh nan zangkhai zawka bag an ah theih dan tur an ruahmanna bawhzuiin an thlirlet a, tun thla chhung hian zawm a nih leh nih loh endik an tum.
Kumin September 2-a Lunglei district-a school naupangte bag rit lutuk avanga zirlaiten harsatna an tawh lohnana hma lak dan tur ruahman tawh bawhzui a nih dan chu Zirtawpni khan Lunglei bawrhsap R Lalthazuala kaihhruaiin thlirho a ni a. Bawrhsap chuan school naupang bag rit lutuk chhawk zangkhai tura ruahmanna chu naupangte hriselna nghawng thil a nih avangin ngaihpawimawh a tul tih a sawi a. An district-a school-ten an zawm tha em, tih vil zui a, a tul anga ruahmanna siamrem a pawimawh tih a sawi a ni.
DC office atangin addl DC leh SDC, School Education department atangin SDEO South leh SDEO Lungsen, DPO (WCD), DCPO leh DIPRO an tel a. Thutkhawm hmasaa thu rel bawhzui a nih dan report a ni a, hma lak zui dan tur sawiho a ni.
Report danin, school naupang bag rit lutuk chhawk zangkhai nana School Education department-in 2021 April 30-a inkaihhruaina thu a lo chhuah tawh chu Lunglei district education officer chuan sawrkar leh private school tinah Mizo tawngin a thawn chhuak a. SCERT-ah sikul exam term khata zir tur ang zela zirlaibu siam tura thlen nise, tia rel chu DC atangin School Education secretary hnenah ziaka thlen tawh niin, zirlaite homework pek chungchanga ruahmanna thar siam a nih theih nan rawtna thlen tel a ni bawk.
Hei bakah hian school tinah lekhabu dahna (bookshelf) neih theih dan ruahman nise, sawrkar inkaihhruaina angin ni khatah class I & II tan subject 3, class III-V tan subject 4, class VI-X tan subject 6 angin class kalpui nise, homework pek chungchangah nitin primary school-ah subject 1, middle school-ah subject 2 leh high school & higher secondary school-ah subject 3 aia tam pek loh nise, tih leh, school tinah zirlaiten tui in tur thianghlim leh hnianghnar an neih theih nan ruahman nise tih te chu, Lunglei district-a school-in an zawm leh zawm loh endik nise, an ti a. Hemi atan hian inspection team dinin, October thla chawlhkar hnuhnung berah endik tan tum a ni.