Science drama inelnaa pakhatna St Paul’s HSS

Science drama inelnaa
pakhatna St Paul’s HSS
SCERT leh sawrkar laipui Ministry of Culture-a National Council of Science Museum huaihawtin Nilaini khan Aizawlah state huapin science drama intihsiak a ni a. St. Paul’s Higher Secondary School chu pakhatna an ni.
Tun tuma sciece drama intihsiak hi a tum 9-na a ni a. Script thehlut tura sawm district 5 atangin school pathum – Shemford HSS Zotlang Aizawl, St. Paul’s HSS Tlangnuam Aizawl leh PES Zotlang Champhai chu intihsiaka tel tura thlan an ni.
Kumin thupui chu “Science & technology for the benefit of Mankind” tih a ni a; sub-theme chu – Women in Science, Smart Agriculture, Digital India: Empowering Lives, Hygiene for all leh Green Technologies a ni. A endikna atan hian scientific content, presentation leh effectiveness chu tehfunga hman niin, endiktu atan mithiam sawm an ni.
St. Pauls HSS pakhatna an ni a, pahnihna Shemford HSS niin pathumna chu PES Zotlang Champhai an ni. Best Script Writer -David Thang Nuntluanga Guite St. Paul’s HSS niin, Best Actor atan RJ Lalpekhlua St. Paul’s HSS thlan a ni.
Intihsiaka pakhatna St. Paul’s HSS hi kumin November 21-a regional intihsiakah Mizoram aiawhin an tel anga, chuta titha pahnih chu nakkum January 6 & 7 a Birla Industrial & Technological Museum Kolkata-a National Science Drama Festival-ah an tel ang.
State level science drama competition hi kum 2009 atangin Mizoramah neih tan niin, science zirna chawilarna leh a pawimawh zia drama hmanga entir chu a tum a ni.
SCERT director Caroline Zoramthangi chuan NEP 2020-in a ngaihpawimawh – science temper, creativity, critical thinking leh experiential learning chu science drama competition hmang hian tarlan a ni tih a sawi.