Scouts & Guides bultantu pual World Thingking Day hmang

Scouts & Guides movement bultantute pualin Nilaini khan khawvel hmundang rualin Mizoramah World Thingking Day hman a ni.
World Thinking Day hi 1926 atanga neih tan niin, Scout & Guides dinchhuaktu Lord Robert Biden Powell leh a nupui Lady Baden Powell te piancham, February 22-ah amahni chawimawina’na neih thin a ni a, an nupa hi an piancham a inang a ni. He ni hi Scouts & Guides ten khawvel hmuntina an unaute an rilrua an hriatchhuahna ni, an hmalaknaten khawvel pumah hna a thawk zel a ni tih hriat tharna ni leh, Scouts & Guides hmalaknaa lawmthu sawina ni atan hman thin a ni a. Tunhnaiah Girls Scout leh Girls Guide ten ramdang leh hmundanga chengte nunphung, zia leh nunhlui chanchin inhriatpawhna atan leh inngaihhlut sak tawnna atan hman uar zual a ni.
Kolasibah chuan Bharat Scouts & Guides Kolasib district president, bawrhsap John LT Sanga’n kaihruaiin hman a ni a. Scouts leh Guides-te chu khawtlang tana mi tangkai ni tura thalaite kaihhruai a pawimawh tih a sawi.
He ni hman rual hian, school chawlh laia Scouts leh Guides-te tan hiking buatsaih dan tur rel a ni a. Hiking chhung hian ram hruaite thlan chhuahnaa duhthlanna chanvo, vote thlak pawimawhna SVEEP kaltlanga inzirtirna, tuihna humhalh kawnga hmalak dan tur inhrilhhriatna leh faina kawnga hmasawnna tur inzirtirna Scouts leh Guides-te tan buatsaih dan turte rel a ni.
Serchhipah pawh district president, bawrhsap Nazuk Kumar hoin Chawngbuangi Memorial School Serchhip Dinthar Vengah hman a ni a. Scouts & Guides hmalakna hian India chauh niloin khawvel huapin min thlungkhawm a, hnamtinte inzahtawnna, inhriatthiam tawnna leh thiltha ngaihhlut tur dik chawisang tura thawh hona min pe, tiin Nazuk Kumar hian a sawi.
He hunah hian Little Flower Convent School, Chawngbuangi Memorial School leh Millenium High School Chhiahtlanga Scouts & Guides ten item an entir a ni.