Season ending WTA Finals: Sabalenka chak nuamsa; Gauff tla fel!

On Nov 4, 2025 3 0

Season ending WTA Finals:
Sabalenka chak nuamsa; Gauff tla fel!
Saudi Arabia khawpui Riyadh-a hmeichhe tennis kum kharna 2025 WTA Finals Pathianni Group Steffi Graf inkhelah world number one Aryna Sabalenka chak laiin defending champion Coco Gauff erawh a title kawl lai hum zui thei dinhmunah a ding ta lo!
King Saud University Indoor Arena inkhelah US Open champion Sabalenka chuan ace tum 11 ngawt hlap chhuak chungin Italian Jasmine Paolini lakah 6-3 6-1 hnehna nuamsa a chang.
Karliamta tir lama kumin bik atana number one ranking luah nghet fel tawh Belarusian hian a first-serve atangin point 66% a hmuchhuak a, Paolini tan chet a khirh!
World number eight Paolini laka a hnehna sualchhuah kha Sabalenka tan kumina match 60 a chak tlinna chiah niin, top-10 player chin a hneh vawi 12-na a ni nghal.
Belhkhawmin chawlhkar 63 chhung world ranking-ah top dinhmun a luah tling tawh a, nikum October thla atang khan a zawn zatin chawlhkar 55 chhung a No. 1 tling ta bawk.
Ku 29 mi Sabalenka hian tunhnai kum nga chhung hian kum kharna Finals la khel zat zat mah se mak angreng takin he title hi a la hlawhchhuak ve ngai lo a, a teuh ber chu kum 2022 final-a Caroline Garcia hneh loa runner-up a nih tum kha a ni.
Inkhel dangah French Open champion Gauff chu double fault tum 17 zet leh unforced error 75 tehreng nei chungin a chipui American Jessica Pegula lakah a tlawm thung.
World number three Gauff hi a serve tum kua ngawt break sak niin, Pathianni Stefanie Graf Group match hnihnaah fifth-ranked Pegula chuan 6-3 6-7 (4-7) 6-2-in a hnawtchhuak fel ta a ni.
Coco Gauff hi hard court specialist tih tur ngat kha ni vein, WTA singles title 11 a lak tawh zing pakua lai chu he leilung behchhana a hlawhchhuah a ni a, mahse, Pahiannia a ngam loh 2023 runner-up Pegula ang bawkin a nghet lo tlat a, chetthat mar a harsat tlat a ni.
Nimin lama tarlan tawh angin, Inrinni opening day-ah khan Serena Williams Group lam chechhuak hmasain, Elena Rybakina leh Iga Swiatek-te paw’n hnehna nen bul an lo tan tawh a ni.