Selena Gomez-i’n Woman of the Year Award dawng dawn

On Apr 19, 2025 20 0

Selena Gomez-i’n Woman of the Year Award dawng dawn
Billboard Latin Women in Music event, April ni 24-a neih turah Selena Gomez chu 2025 Woman of the Year award dawng tura thlan a ni. Award hi Miami-ah an sem dawn a, show darkar hnih awh neiin, Telemundo-ah an tichhuak ang.
Woman of the Year award hi zaithiam, rimawi mai piah lamah pawh kawng hrang hranga hlawhtling te hnenah hlawn thin a ni a, he award hi Sakira leh Karol G te pawhin an lo dawng tawh.
Gomez, kum 32, hi recording artist a nihnaa hlawhtling tak niin, genre hrang hrangah hnuhma tha tak a nei taw a, Billboard Hot 100 (singles) chart-ah pawh a hla 42 a lang tawh a, 2019 khan a hla ‘Lose You to Love Me’ chu No.1 kaiin, Hot Latin Songs chart-ah pawh DJ Snake, Ozuna leh Cardi B te nena an thawhhona ‘Taki Taki’ chu 2018 khan kar 13 chhung a No.1 thei nghe nghe a ni.
Mexican thisen kai, Texas a piang Selena Gomez hian Latin music lamah pawh huang zauhin, a Spanish project hmasa ber ‘Revelacion’ chu kum li kalta khan tlangzarhin, Top Latin Albums chart-ah No.1 a kai a, Grammy-ah pawh Latin pop album category-ah nomination a neih phah bawk. Tunhnai lehzualah chuan a pasal hual Benny Blanco nena an la ‘Ojos Tristes’ chu Hot Latin Songs-ah Top 5 a kai bawk.
Rimawi bakah lemcan leh sumdawnna kawngah pawh a hlawhtling viau a, lemchan lamah pawh award hrang hrang dawng tawhin, mental health leh social justice lamah pawh a thawh hlawk hle a, 2017 khan Billboard Women in Music-ah Woman of the Year a lo ni tawh bawk.
Kumin Billboard Latin Women in Music-ah hian Anitta (Vanguard Award), Belinda (Evolution Award), Celia Cruz (Legend Award), Chiquis (Impact Award), Ha*Ash (Unbreakable Award), Natti Natasha Unstoppable Artist), leh Olga Tañón (Lifetime Achievement Award) te pawhin award an dawng dawn a ni.