Selena Gomez leh Benny Blanco inhual

Selena Gomez leh Benny Blanco inhual
2023 khan an inngaizawng tih thu a thang tan a, kum khat zenzawn an inzui hnuah Selena Gomez, kum 32, leh Benny Blanc, kum 36, te chu an inhual ta. An inhual thu hi Selena hian Instagram-ah puangin, a lunghlu zunbun bun thar chu langsar taka tilangin, “Kumkhua chu a intan ta…” a ti a, Benny pawhin lo comment nghal vatin, “Hey lawks aw…ka nupui a nih kha,” a ti ve nghal bawk.
Benny hian an picnic date-ah Selena hi inneih puiah a sawm niin a lang a, Selena hian phaitual hnim chunga puan phah a thu a a zungbun mawi tih hmel taka a thlir vang vang lai thlalak a post tel, a bul velah Taco Bell leh basket te a lang tel bawk.
Selena leh Benny te hi 2023 nipui lai khan an inzui tan a, kum tawp lamah chuan an inthup tawh lem lo, an pahnih hian an inhriatna chu a rei ve leh deuh tawh a, kum nga liamta khan ‘I Can’t Get Enough’ tih hlaah te pawh an lo thawk dun ve zak zak tawh a, tleirawl kum 16 mi vel an nih laiin SiriusXM Hits 1 interview-ah an lo intawng ve zuai tawh bawk.
Selena hla ‘Single Soon’ tihah an thawk dun a, he hla hi August 2023-ah Selena hian a tichhuak a, he hla an buaipui lai vel atanga inhmel duh ta hi an niin an sawi a, December 2023-ah chuan Selena hian Benny nena an inzui thu hi a zêp tawh lem lo.
Benny Blanco hi music producer niin, Billboard Hot 100 chart-a No.1 kai thei hla 15 zet a lo produce tawh a, rimawi khawvela hming lian tak tak a thawhpui tawhte zingah Rihanna, Katy Perry leh Justin Bieber te pawh an tel. Gomez hi chu sawi ngai loin kan hre deuh vek ang, Billboard No.1 album pathum- Rare, Revival leh Stars Dance te a lo nei tawh a, rimawi leh lemchan khawvelah a hming a chher hle a ni.