Ningani zan khan Europa Conferene League semi-final thawhkhatna khelh a ni a. West Ham chuan London Stadium-a an mikhual AZ Alkmaar chu 2-1 in an lo hneh. Inkhel dangah Fiorentina chu an mikhual FC Basel hneh lovin an tlawm ve thung.
Premier League club West Ham hian an mikhual AZ Alkmaar lakah bul an tan tha lova, goal chhuah hmasa zawkah an tang. Chawlhlawk hmaa an si phurh chu chawlhlawk hnu lamah goal hnihin an chhang let a. An mualah hnehna pawimawh tak an chang.
London stadium-a lenglut AZ Alkmaar tan hian minute 41-naah Tijjani Reijnders chuan hmahruaina goal a thun a. He goal hmang hian minute 67 thleng hmahruai nan an hman. Minute 67-naah hian penalty an chawi vangin an hmahruaina an humhim zo lo. Penalty hi West Ham tan Saïd Benrahma chuan a pet goal a, an si phurh a sut.
An si phurh an sut hnuin EPL club Hammers an phur thar a, goal pawh an thun belh leh thuai. Minute 75-naah Michail Antonio chuan hma an hruai letna goal a thun a. He goal hi hun tawp thlenga venghimin an mualah an chak zui a. 2-1 a hmahruai chungin second leg an hmachhawn thei dawn. Semi-final thawh hnihna hi kar leh ningani zanah khelh a ni ang.
Ninga zanga Europa Conference League semi-final inkhel dangah Italian club Fiorentina chu Artemio Franchi-a an mikhual FC Basel lakah 2-1 in an tlawm a. Second leg hautak zawk an hmachhawn zui a ngaih phah.
Fiorentina hian minute 25-naa Arthur Cabral goal thun hmangin hma an hruai reng a. Chawlhlawk hnu lamah goal hnih an chhuah thung. FC Basel tan hian Andy Diouf chuan minute 71′-naah a si phurh a sut a. Minute 90+2 ah Mohamed Zeki Amdounichuan goal pawimawh tak a thun a, an chak zui ta a ni.
Semi-final ah West Ham an chak
Get real time updates directly on you device, subscribe now.
Prev Post
Next Post