Team player pahnih
Lalhriatpuii leh Lalrinfelite chu BCCI hnuaia tualchhung hmeichhe inelna lian Senior Women’s Inter-Zonal One Day Tournament-ah North East Zone tana khel tura thlan an ni.
-- Advertisement --
Hyderabad-ah Pathianni atangin team paruk tel tur inelna hi khelh tan tur a ni a; Armed Veng nula Lalhriatpuii leh HnahthialModel Veng tleirawl Lalrinfelite hian naktuk, Zirtawpniah team an zawm ang.
India rama tualchhung inelnaa hmeichhe player tha thlankhawm inelnaah hian team paruk – North Zone, South Zone, West Zone, East Zone, Central Zone leh North East Zonete an khel dawn a ni.
Mizo tleirawl pahnih bakah hian Mizoram Senior Women’s Team atangin PC Vansangzuali chu standby-ah dah a ni a, non-playing staff lamah Joseph Lalhriatpuia chu North East Zone manager ni bawk ang.
Cricket Association of Mizoram honorary secretary Mamon Majumdar chuan, “India rama player tha thlanchhuahte zinga kan player-te an tel thei hi a lawmawm hle a, hei hian hma nasa takin kan sawn tih a tilang. Anni pahnih bakah standy leh coaching staff thlenga Mizo pali an awm thei hian Mizoram hi cricket-ah hma kan sawn a, kan than chakzia a tilang bawk,” tiin a sawi.
North East Zone hian Pathianni hian NFC Ground-ah East Zone an hmachhawn ang a, Thawhtanniah North Zone hmachhawn lehin, Nilaini leh Zirtawpniah South Zone leh West Zone an tum ang a, February ni 19, Pathianni khan an match hnuhnung berah Central Zone an tum dawn a ni.