Serchhip Hospital thar atanBlock A building tur sa mek

Serchhip Hospital thar atan
Block A building tur sa mek
Khum 100 awm theihna tur Serchhip District Hospital sak mek chungchang sawihoin Thawhlehni a kaihhnawih thuneitute an thukhawm.
Bawrhsap Paul L Khuma chuan Serchhip district mipuiin hospital thar an mamawh tawh a, mawhphurtuten mahni huang theuhah theihtawp chhuah a tul tia sawiin, central leh state sawrkarin an hmalakna an vil reng a, bialtu MLA leh chief minister ni bawk Pu Lalduhoma pawhin hospital sak mek hmasawn dan a ngaihven reng tih a sawi.
Serchhip District Hospital sak mek hi Block A leh Block B-a then niin, Block A hi PGCIL CSR Fund atangin cheng vaibelchhe 21 senga sak a ni. A sak dan ruangam siamthat a nih avangin PGCIL pawm turin design thar hi thawn thlak a ni a. PGCIL-in zawhna hrang hrang an neih chu Health department-in a chhanna a thawn tawh. An pawm a nih chuan thawhhona thuthlung an ziak anga, ziahfel a nih atanga chhiarin Block A hi thla 18 chhunga peih hman beisei a ni.
Tunah a chhawng hnuai ber chhuat chhun zawh tawh a ni a. Chhawng khatna chhunna tur ban tung fel tawhin a beam chhun zawh a ni tawh a, kar tawpah emaw kar thar bul lamah chhun hman beisei a ni.
PWD chuan hospital sak hna hi uluk takin a vil a. Contractor bungraw hman a tha tawk em tih finfiahna (test) a hun takah an nei thin. Tun thlengin contractor hian test hi an la paltlang thei zel tih report a ni.
Block B hi DoNER ministry hnuai North East Special Infrastructure Development Scheme atanga sak a ni dawn a. Cheng vaibelchhe 50 senna tur concept paper pawm tawh niin, detail project report buatsaih mek a ni.