Serchhip Hospital thuam belh zel

Serchhip Hospital thuam belh zel
Serchhip District Hospital-in inentirna khawl thar a neih belh zel a, Eco Savior Foundation Kolkata kaltlanga hmuh Samsung V6 Ultrasound khawl thar chu Thawhtanni khan chief minister Lalduhoma’n a hawng.
Serchhip damdawi in chu theih ang anga thuam a ni a, an hman mek lung enna (ECG) chu lam hla tak atanga doctor thiam zawkten live-a 5G connection ngata an rawn enpui theih khawpa khawl tha a ni, tiin, nikum October khan Serchhip Hospital-a dah tur 3D dental laboratory a hawng tawh bawk a, Hospital building thar sak mek avangin Govt. Serchhip College campus-ah an dah rih tih chief minister hian a sawi a. Industrial Revolution 4.0 huang ami, 5G connectivity technology nei tho a ni tih a sawi.
He 3D lab hawn rual hian Mobile EGC device leh Drip Monitoring System an hawng nghal a, building thar neih hunah dialysis khawl pawh dah an tum dawn tih a sawi bawk.
“Sawrkar sum engmah seng loin ultrasound khawl thar, tunlai thiamna thar ber hmang chi, khawvel huap pawha a tha pawl tling phak kan nei hi kan lawm a. A buaipuitu Eco Savior Foundation chungah ka lawm em em a ni,” a ti.
Corporate social responsibility tangkai theih zia hrechiangtu chu Serchhip mipui an ni, tiin, “Kan sak mek Hospital building sakna bul ber pawh CSR a ni. CSR hi Companies Act hnuai ami, sawrkar sum seng loa hmasawnna hna tam tak thawh theihna hnar a ni. A hmang tangkai thei tur hian society emaw NGO, Income Tax 12A & 80G registration nei nih a ngai a. He registration nei NGO kan ngah a, anni’n thawhpui tur company an dap chak chuan kan ram tan hlawkna tam tak kan hailut dawn tihna a ni,” Lalduhoma hian a ti.
Sawrkar chuan a pawimawh zia hria in Chief Minister Office-ah CSR Cell an din a. UNDP nen tangdunin Bangalore-ah CSR Conclave an zu buatsaih a, CSR pe thin company lian thahnem tak an zu kawm a. Mizorama hetiang lama tuimite pawh kokhawmin awareness programme an buatsaih tawh tih a sawi a ni.
Serchhip Hospital building thar sak meka harsatna awm sukiang turin hma an la zel a. Hospital chauh pawh niloin Nursing School tur building sak tawh vawiin thlenga la hman tangkai loh chu hman theiha siam an tum tih chief minister hian a sawi. Sawrkar quarters chu Serchhipah an sak belh nual dawn bakah Circuit House pawh cheng vaibelchhe 6 senga sak an tum tih a sawi bawk.
Eco Savior Foundation state head C Lalrinfela sawi danin, tuna an pek Samsung V6 Ultrasound hi cheng nuai 49 man a ni a, a resolution a san avangin a tha bik hle niin a sawi.