Serchhipah National Press Day

November 16 hi India rama chanchinbumite Ni, ‘National Press Day’ a ni a, ramchhung hmun hrang hrangah he ni pual hian hun hman niin Serchhipah pawh MJA Serchhip District chuan he ni pual hian infuihtharna hun a hmang.
Serchhip Press Club-a hun hmanah MJA Serchhip District president C Lalhminghlua chuan thuthar thehdarh kawnga hna an thawhnaah MJA member-te chu a thara an rilru pe turin a sawm a. Chanchinbumi pangngaite chu an rintlak tih sawiin, khawtlang leh ram tana media mite tangkaina a sawi. Tunlai social media kan hman nasat tawh avanga mitinte media lamah kan inhman tawh laiin, sawrkarin a hriatpui media mi an nihna hrereng tur leh an zahawmna humhimtu ni zel turin a chah.
Mizoramah sumdawnna atanga thlir chuan media mite hna chu eizawnna tlak ni lo mah se, ram leh khawtlang rawngbawlna a ni tih hrereng turin Serchhip MJA president hian a chah a. Mipui rilru a chhe zawng leh a tha zawnga kaihruai theitu an nihnaah a tha zawnga kaihruaitu ni turin a chah a ni.
Inthlanpui neih takah media mite zingah mawi lo taka che leh midangte mit tikham zawnga khawsa an awm lo chu lawmawm a tih thu a sawi a. MJA member-te chu mipui leh sawrkar inkara palai hna thawktu, mipui tana ding an ni tih hrereng turin a chah bawk.