Serkhan – Bagha kawng enfiah

Kolasib district bawrhsap Robert C Lalhmangaiha chuan Inrinni khan Serkhan atanga Bagha State Highway dinhmun a enfiah.
Tunhnaia ruahsur nasa avangin Kolasib district chhunga inkalpawhna hmun hrang hrangah a chhe nasa a. A chhe zualpui hi National Highway 306 & 06 an ni. Kawng siamthat hna hi theihtawpa kalpui mek a nih laiin bawrhsap hian national highway ni lo, an district chhunga kawngpui dang, state highway Serkhan to Bagha chu a hmunah a endik a ni.
Serkhan atanga Bagha inkar kawng hi khuar tenau a awm zeuh thin tih lohah chuan a tha thawkhat nia hriat a ni a. Chutihrualin Bukpui, North Hlimen leh Saipum inkar kalpawhna erawh khuar liantham tak tak leh lirthei tana tlan hrehawm tham a awm nual. PWD hotute chuan helai hmun hi hna kal mek a ni, tiin, siamthat thuai an inbeisei tih an lo hrilh a ni.
State highway dinhmun a enfiah bakah bawrhsap hian Saipum khaw hmawra cheng, Manipur atanga raltlante a tlawh a. He hmuna raltlan hi a tam ber chu Manipur Tamenglong district mi niin, Kuki tawng hmang an ni tlangpui. Ei leh bar leh thildanga an harsatna lo thlenin, theihtawpa hma lakpui a tum tih a hrilh.
Saipuma Manipur raltlante a kawm zawh hian Saiphai khuaah village council hotute nen an inkawm a. An khaw panna kawng (approach road) dinhmun chhe lutuk avanga an harsatna lo thlenin, a rang lama siam a nih theih nan bawhzui sak tura ngenna lehkha an lo hlan. Kawng bakah an khaw chawmtu transformer chhiat avanga eng an neih loh chungchang pawh an lo thlen bawk.