Budget Session neih mek a ni a, Session kal mek hian danglamna eng emaw tak a nei; lehkhapuan hman loh tum a ni a, zawhna luh tam ber tum a ni bawk.
-- Advertisement --
February ni 9 thleng khan zawhna 1528 a lut tawh a, February ni 10 thlengin zawhna hi a la dawn theih bawk. Starred question (House chhunga inchhan tur) 1159 leh unstarred question (ziaka chhan chi) 369 a lut tawh.
Assembly Secretariat atanga thu dawn danin, tun hmain hetiang zat hi zawhna a la lut ngai lo a, nikum khan 900 bawr chu a lut tawh.
Zawhna hi thehluh hun a awm a, Session tawp hma ni atanga chhiara ni 15 hma lamah a thehluh theih. Chutianga chhiar chuan tun tum Budget Session hi February ni 28-a tawp tur a ni a, ni 27 atanga chhiar letin, ni 11 leh ni 12 te Inrinni leh Chawlhni a lo nih avangin, ni 10 thleng zawhna a thehluh theih dawn.
MLA-te hian zawhna hi Assembly Secretariat-ah an thehlut a, superintendent, under secretary, deputy secretary, joint secretary, additional secretary, commissioner & secretary te’n an endik hnuah Speaker-in a endik leh thin.
Dan a awm sa, zawhna hi pawm theih tur chin leh pawm loh theih tur chin a awm. Thil hlui lutuk te, mimal inbeihna te, thil ngeiawm ang chi te, chutiang chu pawm loh theih a ni.
Chumi hnuah a chhangtu tur department-ah an pe leh a, anni’n an chhan zawhah an thawn let leh thin. Department thenkhatin zawhna hi an chhan hman loh chang a awm a, kum hmasa lamah khan chutianga chhang hman lote chu chief secretary-in a lo ko tawh nghe nghe.