Session hnuhnung berah kha chuan treasury bench lamah a awm a, minister hial a ni. Session lo awm turah erawh opposition a ni tawh dawn.
-- Advertisement --
February ni 7-a tan tur Assembly Session-ah tun hnaia MNF party atanga hnawhchhuah, minister atanga bantir Dr K Beichhua chuan thutna thar a nei dawn a, opposition a ni tawh ang.
“Hmun danga ka thut a ngai dawn a, Speaker nen kan inbia ang a,” a ti a, Zirtawpni hian Speaker hmuh a tum thu a sawi. Ningani khan Siaha atangin Aizawl a pan a, Session-a tel tura kal a ni. Kum tharah Siaha lamah a inbengbel a ni.
“Ruling lamah ka awm thei tawh nang! Party atanga hnawhchhuah ka ni a, ruling ka ni tawh hlei nem,” a ti a, “Independent member ka ni tawh ang, party ka nei lo a,” a ti bawk.
Opposition bench lamah a thu dawn a, sorkar beia na taka chet a tum em tia zawhna chhangin Dr Beichhua chuan, “Chutiang te chu a rem nang. Kan sorkar, keimahni sorkar a ni a, theihtawp chhuahin kan thawk a, chumi hnua beih nghal chu thil tih chi pawh a ni dawm em ni?” a ti.
MLA atanga bantir a nih loh chhan sawiin, “Mahni thua party atanga chhuak ka ni lo a, party atanga hnawhchhuah ka ni a, chuvangin MLA atanga ka ban a ngai lo. Keimah ka bang a ni lo a, bantir ka ni a,” a ti.
A kal zel dan turah thil tihfel a la awm loh thu a sawi a, politics-ah engtia kal zel nge a tum, eng party-ah nge a awm dawn tih chu ngun taka ngaihtuah a ngaih thu sawiin, “Hei hi chu, ngun taka ngaihtuah a ngai a, mipui nen pawh kan inrawn ang a,” a ti a, “Decision siam a har a, decision siam turin ngaihtuah ngun a ngai khawp mai a,” a ti bawk.