Sharad Pawar bangin nghawng nei nasa

Nationalist Congress Party (NCP) chief Sharad Pawar an president atanga a banna chuan nghawng nei nghalin Nilaini khan Senior party leader Jitendra Ahwad chuan party-a chanvo a neih bansan a tum thu sawiin a thawhpui Anil Patil pawhin MLA atanga ban a inhuam thu a sawi nghal bawk.
Ahwad hi minister hlui leh MLA ni mekin Mumbra-Kalwa constituency, Thane city atanga thlan tlin a ni a, Pawar nena inhmin hnai tak leh Maharashtra-a NCP hruaitu lawk zingah pawh huhang ngah berte zinga ngaih a ni.
Ahwad hi Congress leh Shiv Sena te nena kum 2019-a Maha Vikas Aghadi alliance siam a nih theih nan pawha thluak bur bera ngaih a ni bawk.
“Sharad Pawar hi Lok Sabha inthlan hma emawa Rajya Sabha MP nih hun tawp hma chu president la ni turin kan ngen a ni. Sharad Pawar hian tute pawh a ngaithla vek a, mahse, tumah a la chhang lo,” tiin Patil chuan a sawi.
Hei mai bakah hian Solapur district-a party worker Bushan Bagal chuan Pawar hnenah hian a thisen ngeia a ziah bang lo tura a ngenna lehkha a thawn tia sawi a ni bawk.
Pawar hian kum 1999 khan NCP chu Sonia Gandhi foreign origin issue a ngaihdan inmil lo avanga Congress chhuahsanin a din a, Thawhlehni khan party president atanga ban a tum thu sawiin hruaitu tharin a hruai a hun tawh a ti a ni.
Mahse a hnu lawkah a party member tena nasa taka an nawr hnuah a inngaihtuah nawn leh tur thu leh ‘ni hnih thum’ vel hun a mamawh tur thu sawiin mahse chungte chu a nephew Ajit Pawar an BJP lam a hnaihzia pholanna tia ngaihsak a ni daih thung.
Thawhlehnia kum 82-a upa Sharad Pawar-an a autobiography tlangzarhnaa NCP leader atanga ban a tum thu a sawi hnuah stage-a a awm lai ngeiin hruaitu tam takin kalchilhin mittui nen bang lo turin an nawr zui nghal a ni.
Sharad Pawar-an ban a tumna pawmtu awm chhun nia lang leh hma lam hun sawitu awm chhun chu a nephew leh political heir tura ngaih Ajit Pawar a ni a, Pawar hian NCP chu tiphelin BJP te nena inzawm a duh tia sawi a ni.
Chu chu BJP tena Maharashtra a plan B an neih tia sawisak ni bawkin, Chief Minister Eknath Shinde-an Sena versus Sena case Supreme Court-in a ngaihtuah meka chakna a chan loh chuan BJP te chetlak dan tur tia sawi a ni.
NCP worker te chuan Sharad pawar chuan working president ruat mai se, ani chu party chief la ni zui zel se an ti bawk a ni.