Sudan chhuahsan 100,000 tling ti

April ni 15-a sipai pawl pahnih te inkara inbeihna chhuah hnuah Sudan chhuahsan mi 100,000 an awm tawh tiin UN chuan a sawi.
Inbeihna a tawp lo a nih chuan official te chuan chhiatna nasa tak a thleng ngei dawn tiin an hlauhthawn thu an sawi lawk a. Hei bakah hian Sudan ram chhungah chenna mumal nei lovin mi 334,000 vel an awm mek tiin an sawi bawk.
Indona hi capital Khartoum leh a chhehvelah regular army leh paramilitary Rapid Support Forces (RSF) te chu inkahhaina puan a ni chungin an inbei reng a ni.
Diplomatic hmangin pawl pahnih tena inremna an neih theih nan theihtawp chhuaha hmalak mek a ni a. Thawhlehni khan South Sudan foreign ministry chuan army leh RSF te chuan ‘a thuphungin’ 4 May atangin ni sarih chhung inkahhai puan an remti a, inbiakna a awm theih nan aiawh tirh an remti dun a ti bawk.
A hma lawkin UN sepcial envoy to Sudan, Volker Perthes chuan AP news agency hnenah pawl pahnih te chuan inkahhaina ‘ngelnghet leh rintlak’ a awm theih nan inbiakna neih an remti a lo ti tawh bawk a. Inbiakna neihna hmunah Saudi Arabia chu rawt a nih thu a sawi bawk a.
Peace talks neih theih a nih chuan pawl pahnih tena inbeihna an neih hnua inbiakna neihna hmasa ber a ni dawn a ni.
Sudan buaina avang hian mi 500 chuangin nunna chan tawhin mi 4,000 chuangin hliam an tuar tawh tiin Sudan health ministry chuan a tarlang a. Inkahhaina awm theih nana hmalakna te chuan awmzia a nei vak lo thung a. Khartoum khawpui chu RSF te tihchak loh nan vansang atanga beih chhunzawm reng a ni bawk.
RSF te chuan regular army te MiG fighter jet an kahthlak thu sawiin mahse independent a finfaih a ni lo thung a. Hei bakah hian Sudan khawthlang lama Darfur ah inbeihna a nasa bawk.
UN refugee agency spokeswoman Olga Sarrado chuan Geneva khawpuia reporter te hnenah mi 100,000 total included people from Sudan chhuahsana refugee an pun chak thu a sawi a. Refugees te hian hmar lamah Egypt pan berin khawthlang lamah Chad an pan thung.
European ram te chuan Sudan ram chhunga an khua leh tuite an la chhuak deuh vek tawh a, Russia pawhin thawhlehni khan an mi leh sa 200 vel phurchhuak turin military plane pali a tirh luh thu a sawi bawk.
Khartoum khawpui chuan chaw, tui thianghlim leh electricity a tlachham hle tawh a, chakkhai a lakna ber Port Sudan chu inbeihna avangin hman hleihtheihlohin a awm mek bawk a, hei bakah hian rukruk a hluar hle bawk.
World Health Organization (WHO) regional director Ahmed al-Mandhari chuan Khartoum a health facility te chuan beih tawkin hei vang hian healthcare worker leh civilian damdawi ina awm ten an thih phah tiin a sawi a.
“Hei mai bakah hian heng damdawi inte hi military base-ah hman niin staff te chu hnawhchhuahin an awm a, dam lo te pawh hnawhchhuahin an awm,” tiin a sawi bawk.
Sudan-a UN’s Humanitarian Coordinator Abodou Dieng chuan kar hnih chuang nasa taka inbeihna avangin Sudan chuan humanitarian crisis turu tak a tawk thei mek reng tawh tiin a sawi bawk a.
“Buaina chhuah hma pawhin Sudan mipui hmun thuma thena hmun khat, maktaduai 16 dawn te chuan tanpuina an mamawhsa reng tawh a. Tun dinhmunah mi maktaduai 3.7 te chenna mumal nei lovin an awm mek a, heng zinga a tam ber te hi Darfur region a awm te an ni” UN’s Humanitarian Coordinator Abodou Dieng chuan a sawi bawk.