Shillong-a KSU rally-ah tharum thawhna thleng nasa

thawhna thleng nasa
Khasi Students’ Union (KSU)-in Nilainia black-flag motorcycle rally an huaihawtnaah Shillong hmun hrang hrangah tharum thawhna a thleng a, police-in an hruaitu pathum manin thubuai an siamsak.
KSU hruaitu – KSU President Raymond Kharjana, General Secretary Reuben Najiar leh Vice-President Pynkmenlang Sanmiet te hi Nilaini zanlai vel khan man niin Sadar Police Station-ah lak an ni.
Nilainia kawng an zawhnaah lirthei tam tak a chhia a, mi kutthlak te, sorkar lirthei hal te pawh a awm niin Meghalaya police chuan an sawi a. Swami Vivekananda leh Netaji Subhas Chandra Bose-a limte pawh suasam a ni bawk.
Meghalaya-a Khasi Hills-a zirlai pawl chak tak, KSU hian an thil phut panga tihhlawhtlin ngiatin rally hi an huaihawt a. An thil phut zingah hian hna lakna, ram leilung fate humhimna, pawn lam atanga pem leh khuarel thil kaihhnawihte pawh a tel.
Polo, Barik leh Mawlai telin state khawpui hmun hrang hrangah buaina a awm tih sawi a ni.
Police escort vehicle tihchhiat a ni a, a tukverh lehlam pakhat a keh vek a. Barik-ah National Informatics Centre (NIC) lirthei chu a hnung lam darthlalang tihkeh a ni a. Pickup truck leh telecom department lirthei telin a dang tam tak pawh tihchhiat a ni.
Mawlai-ah phei chuan Food Corporation of India (FCI) pisah sorkar lirthei hal a ni bawk.
RR Colony-ah darthlalanga hung Swami Vivekananda lim tihchhiat a ni a, he lim hi kum 2025-a RRCWS-in an din a ni.
KSU hian Thawhlehni khan state sorkarin an thil phutte a tihlawhtling lo a nih chuan lungawi lohna na takin an lantir dawn tih an lo sawi tawh a. Laitumkhrah Police Point-a vantlang hmaa thu a sawinaah General Secretary Najiar-a chuan an pawl chuan Shillong pumah black-flag march an huaihawt dawn tih a puang a ni.
“Naktuk atang hian kawtthlerah chhuakin kan lungawi lohna kan lantir dawn a. Shillong-ah black-flag march hmanga bul tanin sorkar nawrin kan bei dawn a ni,” tiin a sawi a ni.
KSU hian Thawhtanni leh Thawhlehni khan Shillong hmun hrang hrangah vantlang inkhawm kovin an thil phut an lo au chhuahpui tawh a. Sorkar chu ‘five-point charter’ an tih an thil phut chhanna hun atan ni 15 hun an pe.
District thuneitute chuan Nilainia rally an huaihawt hi an phalsak a; mahse, tiamchin an nei a, hmun khirh deuh lai bikah chuan venhimna pawh khauh takin an kalpui a. East Khasi Hills Deputy Commissioner Abhilash Baranwal-a chuan thuneitute leh KSU hi an inbe reng a, dan leh thupek kenkawhna buai zawnga chet loh ni se an ti niin a sawi.