‘Showgirl’ mtd 3 hralh tawh

‘Showgirl’ mtd 3 hralh tawh
Taylor Swift album thar ‘Life of a Showgirl’ chu US-ah copy maktaduai thum an hralh tling tawh a, hei hi album tak tak (physical leh digital sales) a ni a, he album-a hla hrang hrang chu an tlangzarh atanga ni hnih chhungin vawi maktaduai 300 chuang stream a ni bawk.
Album hralh zat chhut nan hian album tak tak hralhna (traditional album sales) bakah streaming atanga album hralhna tlukpui (on-demand official audio leh official video stream-ah ad-supported 3,750 stream emaw 1,250 paid/subscription stream chu album pakhat hralh anga chhiar a ni a, album-a hla mal 10 hralh leh album pakhat hralh intluk a ngaih a ni bawk) leh album-a hla a mala hralhna atanga album tlukpui te belhkhawm a ni a, tuna ‘Showgirl’ maktaduai 3 an hralh tlin tawh hi traditional album sales a ni.
He album hi October ni 3-a tlangzarh kha niin, an tlangzarh ni-ah US-ah maktaduai 2.7 an hralh thei a, US-a kar khat chhunga album hralh tam ber dawttu a ni nghal a, kar khat chhunga maktaduai 3.378 hralh theih, Adele ’25’ chiah a pha lo. Billboard chart siam nana kar khat hun an lak hi Zirtawpni atanga a karleh Ningani thleng a ni a, ‘Showgirl’ pawh hi nimin leh vawiin hralhna an belh leh hunah chuan Adele record hi a khum theih mai an beisei a ni.
Nimin khan traditional sales chauh ni lo, streaming leh hla mal hralhna laktel chuan US-ah maktaduai 3.2 a hralh tling tawh a, hei pawh hi kar khat chhunga US-a album hralh tam ber dawttu niin, Adele ’25’ chiah a pha lo a, Adele ’15’ hi December 2015-a an tlangzarh khan kar khat chhungin US-ah maktaduai 3.482 an hralh thei a ni.