Si phur hmasa chunga chak let Barcelona
Estadio Municipal Jose Zorrilla inkhelah Inrinni zan khan goal chhuah hmasa zet chungin player naupang te te khalhkhawmna Barcelona chuan 2-1-in mualneitu Real Valladolid an hnehlet a, La Liga table-ah point sarih ngawtin anmahni hnaihbertu Real Madrid an kalsan ta.
Inrinni inkhelah hian Ivan Sanchez chuan tan atanga minute rukna lekah rinloh taka Valladolid hmahruaina goal khungin, second half tir lam minute ruk chhungin substitute Raphinha leh Fermin Lopez-te’n mikhual team tan an chhanglet a, season thara division hniam zawka tlahniam chiang tawh Valladolid-in an kawtkaiah goal dang an khungbelh zo tawh lo.
Barca boss Hansi Flick chuan karliamta Nilaini Champions League semi-final first-leg match pakhata 3-3-a an mikhual Inter Milan an inhnehtawkpui ringawt tuma a player chhawr pakua ngawt kha awltirin player naupang leh tawnhriat nei tlem zawk rual a chhawr a; Thawhlehni Italy ram second leg-a Inter an luhkhung tur mitthla chungin a first team player a hahdamtir a, chuti chung chuan tla chiang tawh Valladolid mualah hnehna an chang zui ta tho a ni.
Goal chhuah hmasa zawk ni eng ang mah se Catalan team khan hun pumin inkhel an thunun tho a, minute 38-a inhliam debutant Dani Rodriguez thlaktu Lamine Yamal luh hnu phei chuan a khelhah an chungnung zual a, chuti chungin half time hma zawng an siphurh an sut zo chuang lo!
Minute 54-a Barca siphurh suttu Raphinha khan season kal laiah La Liga goal 16 a thun tling ta a; minute 60-a chakna goal thawhtu Lopez ve thung khan tun season-ah league goal vawili a khawl tling ve chiah thung.
Barcelona kha league game an khelh hnuhnung vawi 15-ah tlawm nei loin, chu’ng zinga match 13-ah an chak a; Valladolid nen an inkhelh hnuhnung tum 19-ah vawi 17 an chak tling ta bawk.
Nizan result tarlan hman loh inkhel ngaihven hlawhah Real Madrid-in an mikhual Celta Vigo an hneh chuan an chung chiaha hmahruaitu team nena an inkar chu point liah bawk an dah zui leh thei dawn a ni.
Spanish club ropui pahnih hi May ni 11 mai hian an intawng dawn a, hei hi title race kal laia inkhel ngaihven hlawh a ni ang.
Si phur hmasa chunga chak let Barcelona
Get real time updates directly on you device, subscribe now.
Prev Post
Next Post