Sialsir sava lo dimdawi turin ngen lawk

Sialsir sava lo dimdawi turin ngen lawk
Mizoram thla hnih chhung vel a mikhual thin Sialsir sava (Amur Falcon) chu an rawn lawi luh a hun dawn avangin sawrkar, VC leh YMA te hnenah an huamchhung theuhah him dam leh thlamuang taka an awm theih nan lo humhalh turin an ngen tih Centre for Environment & Social Justice chuan an sawi.
CESJ thuchhuak chuan, kumtinin thlasik laia pem thin Sialsir savate hi lam hla tak atangin an rawn kal thin a. Mizoramah chuan favang leh thlasik lai hi pipute hunlai atang tawha ramvah, sapel leh sava veh huna kan neih a ni a. Heng hunah hian kan rama sava, ramsa leh sava pem chite nasa taka suat an ni thin tih a sawi.
Mizorama an cham chhunga hlau lo leh thlabar loa hahdam taka an chawlh theih nan, humhim leh chawlhna tlaka kan ram lo enkawl hi a Mizo a, a Kristian bawk, tiin, Sialsir sava him nan hma la turin Central YMA hruaite hnenah YMA Branch zawng zawnga hrilhhre turin, Mizoram Village Council Association president hnenah Mizoram puma VC tin hnena hrilhhre turin an ngen a. Mizoram district tina DC/district magistrate te hnenah an district huamchhunga Sialsir sava leh nungcha dangte thahna – silai, sairawkherh, air gun leh thang khap tura an ngen bakah mipui hnenah heng sava, thlahnih emaw chauh cham turte hi dimdawi turin an ngen tih a sawi bawk.
Sialsir (Amur Falcon – Falco amurensis) hi sahel ei chi sava zingah chuan hriat theih china pem thui ber an ni tih CESJ hian sawiin, Mongolia, China leh Russia atangin thlasik khawvawt tlansanin South Africa-ah an pem thin a. Mongolia, China leh Russia ramah hian no neiin an awm a, thlasik a lo thlen dawn meuh chuan South Africa lam panin an zinkawng an zawh tan thin. Khuangchawi thla laihawlah chuan Mizoram pawh an lo thleng tawh thin tih a sawi.
‘An zinkawng hi a thuiin a hautak a, India khawmualpui leh tuifinriat (part of Bay of Bengal and Arabian Sea) an paltlang a tul a. Kum 2013-a Nagaland atanga satellite tracker an vuahna sialsir pa ‘Naga’ tia an phuah phei chu Nagaland atanga Mizoramah rei vak lo a chawlh hnua a thlawk leh chu chawl miah loin ni 5 leh darkar 10 a thlawk a, Africa khawmualpui Somalia vaukamah a kai thei a ni,’ a ti.