Afghanistan lirnghingah mi 20 vel thi

Afghanistan lirnghingah mi 20 vel thi
Lirnghingin Afghanistan hmar lam a sawiah mi 20 vel an thi niin tual chhung thuneituten an sawi a, chhanchhuah hna thawh mek niin thi zat hi an pun ngei rin a ni.
Health department thupuangtu, Samin Joyenda chuan hliam tuar mi za tel an awm tawh bawk thu a sawi.
Lirnghing hian mi 5,00,000 vel chenna, Mazar-e-Sharif hi Thawhtanni zing dar 01:00 (India-a zing dar 02:00) velah a sawi a ni.
Magnitude 6.3-a na, lei hnuai km 28 vela thuk atanga intan niin US Geological Survey chuan a sawi a, orange alert level pein hei hi ‘chhiatna thlen nual thei’ tihna a ni.
Balkh province-a Taliban thupuangtu, Haji Zaid-a chuan X-ah Mazar-e- Sharif chhim lam hret, Sholgara district-ah ‘hliam an awm nual’ tih a tar lang a. “Hliam tuar tam zawk hi in sang atanga thil tlain a delhte an ni,” a ti.
Mazar-e Sharif-a chengte hi khawlaiah an tlanchhuak a, an in a chim mai hlau takin an awm hlawm.
Kabul-a police tana Taliban thupuangtu, Khalid Zadran-a chuan thil thlen dan an ngaihven reng tih X-ah a tar lang bawk.
Afghanistan hi August thla tawp khan magnitude 6.0-a nain sawi tawhin mi 1,000 chuang an lo thi tawh bawk.
Lir a nghin hian thingtlang lam, thing leh hluma sak inten an tuar na thei hle a. A chim karah mi tam tak tang an awm theih phah thin.
Afghanistan hi lirnghin duhna hmun a ni a, Indian leh Eurasian tectonic plate intawhna laia awm a ni.