Silent period hmang ta

Silent period hmang ta
Mizorama district 9-a February 12-a village council leh local council inthlanpui neih turah February 10 tlai dar 4.00 atang khan campaign phal tawh loh, ‘silent period’ hman tan a ni tawh.
State Election Commission Mizoram thu angin, district election officer tin chuan anmahni huamchin theuhah campaign phal tawh loh thu hi an chhuah a. VC/LC inthlanpui hi February 12 zing dar 7.00 atanga tlai dar 4.00 inkar zawng vote thlak theih tur niin, vote thlak tawp hun tlai dar 4.00 a nih angin, darkar bituk atanga chhiarleta darkar 48 – February 10 tlai dar 4.00 atanga tanin, mipui (voter) ten chimbuai loh leh rilru fim taka duhthlanna an siam theihnan ‘silent period’ atana puan a ni.
Silent period hman hnu hi chuan, inthlan kaihhnawih lam chi campaign reng reng tih tawp vek tur a ni a; political party campaigner zawng zawng, constituency huamchhunga vote nei lote chuan constituency an chhuahsan vek tur a ni. Silent period chhung hian sawrkar leh a agency-te kaltlanga tanpuina lam chi reng reng, MCC Chapter 8 Code No.12 a inziak tiamin pek chhuah rih loh tur a ni a; mipui vantlang pawipang, chhiatni thatni leh mipui nun nghawng thil bik leh inthlan kaihhnawiha vantlang hriat tur official-te hriattirna bak aurinna lam chi reng reng hman phal a ni tawh lo a ni.