Singham Again leh Bhool Bhulaiyaa 3-in Indian box office record siam

Singham Again leh Bhool Bhulaiyaa 3-in Indian box office record siam
Bollywood film pahnih ‘Singham Again’ leh ‘Bhool Bhulaiyaa 3’ te chuan belhkhawmin tun weekend kalta khan India-ah cinema hall ticket hralhna atangin cheng vaibelchhe 200 chuang an la lut thei a, India-ah weekend khata film pahnih sum lak luh belhkhawma tam ber a la ni.
Heng film pahnih te hi November ni 1 a tlangzarh ve ve niin, Zirtawpni, Inrinni leh Pathianni-a an sum lak luh hi Singham Again-in cheng vaibelchhe 121 leh Bhool Bhulaiyaa 3-in cheng vaibelchhe 106 niin, a belhkhawmin cheng vaibelchhe 227 a tling a, record thar a siam. A hmaa hetiang record chu ‘Animal’ leh ‘Sam Bahadur’ siam niin, heng film pahnih ni thum chhung sum lak luh belhkhawm chu cheng vaibelchhe 190 niin Box Office India-in a tarlang.
Ajay Devgn channa ‘Singham Again’-ah hian Bollywood star inlan an thahnem hle a, Kareena Kapoor Khan, Deepika Padukone, Tiger Shroff, Arjun Kapoor, Akshay Kumar leh Ranveer Singh te an inlan a, cinema hall-a chhuah tan ni, Zirtawpni-ah cheng vaibelchhe 43.5 la lutin, Inrinni-ah cheng vaibelchhe 42.5 leh Pathianni-ah cheng vaibelchhe 35 a la lut thei a, Diwali boruakin cinema hall ticket hralh a nghawng viau a ni.
Kartik Aaryan channa ‘Bhool Bhulaiyaa 3’ pawhin Zirtawpni-ah ceng vaibelchhe 35.5 la lutin, Inrinni-ah cheng vaibelchhe 37 leh Pathianni-ah cheng vaibelchhe 33.5 a la lut thei a, tihian opening weekend-ah cheng vaibelchhe 106 la lutin, Kartik Aaryan channaah chuan opening weekend-a sum la lut tam ber a la ni a, opening weekend-a cheng vaibelchhe 100 la lut thei film a channa hmasa ber a ni.
Bhool Bhulaiyaa 3 hi Anees Bazmee direct niin, Bollywood star Vidya Balan, Madhuri Dixit, Triptii Dimri leh Rajpal Yadav te pawh an inlan. A film hmasa ber ‘Bhool Bhulaiyaa’ chu 2007-a tlangzarh niin, Akshay Kumar leh Vidya Balan te channa a ni a, 2022-ah Bhool Bhuliyaa 2 tlangzarh lehin Kartik Aaryan, Kiara Advani leh Tabu te an chang ve thung.