Sinlung Hill Council inthlana hman tur e-roll siamtha dawn

State Election Commission thuchhuak angin Sinlung Hills Council 2024 Summary Revision neih tura draft electoral roll chu Thawhlehni khan Aizawl bawrhsap, district election officer ni bawk Er. Lahriatpuia chuan mipui en theihin a tlangzarh.
Sinlung Hills Council-ah hian constituency 6 a awm a, polling station 19 a awm. 2024 October 1-a kum 18 tling tawh chin chu electoral roll-ah hian thun theih an ni dawn a. September 11-17 chhung hian hming thunluh ngai, paih ngai leh siamthat ngai tan dilna hun hawn a ni dawn. Dilna lut hi September 18-23 chhungin ERO/AERO ten a hmunah kalin an enfiah ang.
Electoral roll hi September 24-28 chhunga peihfela a ni anga, Sinlung Hills Council inthlanpuia hman tur final electoral roll chu September 30-ah tihchhuah a ni ang.
Electoral roll siamthat turah hian addl DC Mark Lalthanliana chu electoral registration officer atan ruat a ni a. Sakawrdai SDO (C) N Lalzarzova leh Thingsulthliah BDO Malsawmhriatzuali te chu AERO atan ruat an ni.
Sinlung Hills Council draft electoral roll-ah voter 10458 awmin, mipa 5189 leh hmeichhia 5269 an ni. Voter tlemna ber polling station chu Upper Sakawrdai PS niin voter 104 an awm a, voter tamna ber chu Sakawrdai-I PS niin voter 1134 an awm.