Aizawlah Assam Rifles te awm mekna hmunah mi 61-in ram neiin LSC an nei a, surrender tawh pawh an awm tih revenue minister Lalruatkima’n House a hrilh.
-- Advertisement --
Aizawl West III bialtu VL Zaithanzama zawhna, ziaka chhan chi chhangin revenue minister hian Assam Rifles luah rama LSC nei zat leh a neitute hming a sawi a, an zinga mi pariatin LSC an surrender tawh thu a sawi.
Minister chhannaa a lan danin, Assam Rifles commandant bangalow ramah mi paliin LSC an nei a, McDonald Hill-a Assam Rifles ramah mi pathumin, Main Barrack area, Lammual ramah 54-in LSC hi an nei. An zinga pariat chuan LSC hi an pe kir tawh a, mi 53-in LSC an la nei tihna a ni.
LSC neiah hian Village Council Court pahnih a awm a, primary school pakhat a awm bakah PHE department pawhin LSC an nei.
An hming atanga enin LSC neiah hian mi panga chu hnam dang an ni a, mahse an address chu Aizawl vek a ni.
‘AR te ram humhalhna turin rauhmanna siam a ni em?’ tih zawhna chhangin minister Ruatkima chuan, “Hemi atan hian The Mizoram (Restriction on Use of Transfer Land) Act, 2002 chu Mizoram Gazette dt. 19.12.2002-ah notify a ni tawh a. He act effective date atan hian ni 23.11.2005 hi official Gazette hmangin ruat a ni tawh bawk,” a ti.
The Mizoram (Restriction on Use of Transfer Land) Act, 2002 hi Budget Session neih mekah hian siamthat (ammend) a ni a, he danah hian LSC neitute’n an pe kir (surrender) lo a nih chuan hrem theih an ni dawn a, lung in tantir theih an ni ang. Mahse India ram kum 75 tlin chungchangah, lung ina intantir hi suahsualna leh pawikhawihna lam ni lo thil dangah tih loh theih ni se tih a nih avangin, Budget Session neih mekah hian siamthat a ni a, pawisa chawitira inhrem theihna turin dan hi siamthat a ni ta a ni.
Minister chuan he danah hian sipaiin an chhuahsan hunah an luah ram hi mipui tan chauhva hman tura tih a nih thu a sawi a, LSC lo neih hi khap a nih thu leh, pek kir ngei a ngaih tur thu a sawi.