Union Finance Minister Nirmala Sitharaman chuan Union budget 2023 a pharhah ngaih pawimawh zual tur pasarih thur chhuakin heng te hi insi tawn reng niin Amrit Kaal kaltlanga sorkar hmalak zelna tur a ni a ti a.
-- Advertisement --
Amrit Kaal hi Modoi sorkar in kum 2047-a India-in zalenna kum za a tlin lawmna neih hmaa kum 25 chhung a sawina a ni a. BJP sorkarin hma lam hun kum 25 atana ngaih pawimawh bik a neih pasarihte chu – Inclusive development (hmasawnna huapzo), Reaching the last mile (kilkhawr ber thlenga thlen), Infrastructure leh investment, theihna sawrchhuah, green growth, youth power leh financial sector te an ni.
Inclusive development pawimawhna sawiin Sitharaman chuan sorkarin Sabka Saath Sabka Vikas policy a neih chuan society a section hrang hrang hmeichhia, SC, ST, OBC te leh underprivileged section te a tanpui nasa tiin a sawi a.
Health sector bikah nursing college thar 157 din a ni dawn tia sawiin Pharmaceuticals lamah research programme thar chu public leh private medical research anga kalpuia ICMR labs te kaltlanga kalpui tur a ti bawk a.
Sorkar chuan Sickle Cell Anaemia (SCA chu kum 2047 ah nuai bo hman a tum a ni, tiin Sitharaman chuan a sawi bawk.
Education sector lamah, National Digital Library chu naupang te tan din a ni dawn a, State te pawh physical library te panchayat leh ward level a din tura tur an ni dawn bawk.
Khaw khen nasat thinna Karnataka-ah chuan micro irrigation kalpui nan sum lama tanpuina pek an ni dawn a. Pradhan Mantri PVTG Development Mission kalpui hmangin Eklavya Model Residential School teacher tur 740 lak chu ngaih pawimawh a ni ang tiin Sitharman chuan a sawi bawk.
Hei bakah hian green growth lamah nasa taka hmalak tur niin carbon intensity tihhniama green job opportunity siam tum a ni, a ti bawk a.
Saree sen a sirfem a dum leh gold colour a chei ha in Sitharaman chuan budget a pharhah kum 2019 atanga khan a budget speech te chu briefcase-ah ni lovin ‘bahi-khata’ in a keng a. Bahi khata style pouch sen chhungah digital tablet a dah a ni.
Thawhlehni khan Sitharaman chuan Financial Year 2022-23 a Economic Survey a lo pharh tawh bawk a, chutah chuan India chu Covid-19 pandemic atangin a in recover fel tawh thu sawiin Indian economy chu kum 2023-24 ah 6-6.8% vela a than tur thu a sawi a. Kum 2021-22 kha chuan tun fiscal ah hian economy chu 8.7% leh nikum khan 7% a thang tura hisap lawk a ni thung.
Budget 2023 hi Modi sorkar second term a full budget pharh hnuhnung ber niin nakum April-May 0224 ah Lok Sabha inthlan a awm dawn a ni.
Personal Income Tax
Budget 2023-24 chuan personal income tax lak theihna tisangin a hmaa Rs 5 lakh chin lalut tana tax lak tur chu tunah chuan Rs 7 lakhs chinah tihsan a ni tawh thung.
A hmaa income slab paruk chu panga a sawr zim niin tax rate tharah Rs 0-Rs 3 lakh lalut chin tan income tax chawi a ngai lo va, Rs 3-6 lakhs la lut chin tan 5% chawi tur a ni thung a, Rs 6-9 lakhs lalut te tan 10%, Rs 9-12 lakhs lalut chin tan 15%, Rs 12-15 lakhs lalut chin tan 20% leh Rs 15 lakhs chunglam lalut tan 30% pek tur a ni thung.
Kum khata Rs 9 lakh chin lalut te chuan a hmaa tax-a Rs 60,000 an pek thin chu Rs 45,000 chauh an la tawh dawn a. Chutiang bawkin Rs 15 lakh chin lalut te chuan 10% chauh tax ah an pe tawh dawn a ni.
India rama tax rate sang ber chu 42.74% a ni a, khawvelah pawh a sang filawr zingah a tel a. Tun tax regime tharah chuan surchange rate pawh 37% atangin 25% ah tihhniam tur niin hei vang hian maximum tax rate pawh 39% ah a tlahniam dawn tawh a ni.
Centre of excellence for Artificial Intelligence
Trust-based governance kalpuina zelah Jan Vishwas Bill hangin 42 Central Act siam that a ni ang a. He budget hian chumi tur chuan ruahmanna hrang hrang a siam a ni tiin Sitharaman chuan a sawi a.
Make AI work for India mission kalpuina zelah Artificial Intelligence centre of execellence pathum lai chu top educational institutions ah din a ni ang, tiin Sitharaman chuan a sawi bawk.
Centre capex Rs 13.5 lakh crore
Centre-in captial expenditure tha zawka a kalpui theih nan Rs 13.5 lakh core, GDP atanga chhuta 4.5% lai dah a ni tiin Sitharaman chuan a sawi bawk a.
State sorkar te hnenah 50 year interest-free loan kum khat atan pawhsei ka remti bawk a, he mi atan hian Rs 1.3 lakh crore a dah a ni a ti bawk a.
Railways tan Rs 2.40 lakh crore dah niin chu chu sum dahsan ber tum niin kum 2013-14 outlay nena chhut phei chuan a let 9 laiin a sang zawk a ni tiin FM Sitharaman chuan a sawi bawk.
Thil man tlawm leh to tur
Budget pharha nih hnuah gold bar atanga siamna thil te, sikret, jewellery, silver, electric kitchen chimney, bicyle leh toys ram dang atanga chawkluh, electronic vehicle ram dang atanga chawkluh te chu a man a sang dawn a.
Man tlawm zual tur te chu mobile phone parts, TV panels part, Lithium ion battery machinery, EV industry mamawh raw material te man a hniam thung ang.
PAN
Permanent Account Number (PAN) chu sorkar agency hrang hrang ten digital system hmanga business identifier-ah an hmang ang tiin Sitharaman chuan a sawi a. Hei hian sumdawn a tiawlsam dawn a ni a ti bawk a. Hei bakah hian Aadhar leh Digilocker te pawh common identifier-ah hman a ni ang a ti bawk.
Income Tax Department chuan December 24, 2022 khan thuchhuah lo siam tawhin permanent account numbers (PAN) leh Aadhaar in thlunzawm lote chu kumin March thla hian hman theihin a awm dawn tawh lo an lo ti lawk tawh a ni.