By Dr J.T.Vanlalngheta
Vice Chairman
Govt MZ Law College AA
-- Advertisement --
A tâwi thei ang bera sawi chuan, Uniform Civil Code (UCC) chu ‘dan inang tlâng’ sawina a ni a; kawng danga sawi chuan, rawtna (proposal) sawina a ni bawk; mahse, han ngaih mai ai hian a kawh leh hlen chhuah a tum erawh chu a ril hle si a ni. Sakhaw tih dan bil– entir nân, mipa leh hmeichhia chauh inneihna dân hrang hrang ang chi– hnam bil leh sakhaw lehkhabu hrang hranga lo chuang tawh an nihna anga hman thinte chu a lo tawpa, khua leh tui zawng zawngtena zalên taka dân inang tlang siam leh hman chu a tum a ni.
UCC chungchanga inhnialna hi thil thar a ni lo va, British Sawrkarin India ram an awp hun lai (1858-1947) khan a lo awm daih tawh a; chubakah, hemi hma deuh, East India Company-in thu neihna an chan hun lai (1757-1858) pawh khan India rama sakhaw hrang hrangte tih dan bil, hnam bil leh tualchhunga tih dan bil hrang hrangte chu hrût rual a, a aiah khawthlang ram te thil ngaihtuah dan (ideologies) leh chin dante chu India mite hman (luih)-tir an lo tum tawh a ni.
India mahnia ro a lo inrela ram Danpui siam a nih khan inkaihhruaina ‘directive principles’ chu ram danpuiah bilh tel niin he Danpui article 44-na hian hun lo kal turah India khua leh tui zawng zawngtena dan (law)inang tlang an hman/neih theih nana dan siam turin policy siamtute chu a lo beisei lâwk bawk a ni.
Mahni hmeichhiat mipat anpui nupui pasala inneih theihna ang chi dan hi tun thleng hian India rama eng danah mah hian a la awm ngai lo va; he dan duan chhin hian a thuphunga mihring- mipa leh hmeichhe nihna anga thliar hran chu a tum a nih loh avangin, tihhlawhtlin lo ni ta se, Pathian min siam dan leh duh dan kalhin, a duhte tana mipa leh mipa, hmeichhia leh hmeichhiate inneih theih nan kawng a lo inhawng dawn ta a ni.