Sorkar sikulah naupang an tlem telh telh nia ngaih thin a ni a, mahse a chhinchhiahna lamah chuan sorkar sikulah zirlai hi an lo tam zawk.
-- Advertisement --
Education minister Lalchhandama Ralte-in Budget Session neih meka House a hrilh danin, Mizoramah sorkar sikulah zirlai 1,28,927 an awm a, private sikulah zirlai 1,26,314 an awm.
Minister hian Aizawl South I bialtu C Lalsawivunga zawhna chhangin pawl 1 atanga pawl 12 thlenga zirlai awm zat hi a sawi a, private sikul aiin sorkar sikulah 2,613-in an tam zawk a ni.
Minister-in ziaka chhan chi zawhna chhanga a sawi danin, pawl 1, pawl 6, pawl 7, pawl 8 leh pawl 9-ah te sorkar sikulah zirlai hi an tam zawk a, pawl tam zawkah chuan private sikulah hian an tam zawk tihna a ni. Mahse a pum pui belhkhawmin sorkar sikulah hian zirlai an tam zawk.
Pawl 1-ah hian an inthlau a, sorkar sikulah zirlai 21662 an awm laiin private sikulah chuan 14309 an awm.
Minister hian pawl tina zirlai awm zat hi Unified District Information System for Education (UDISE) chhinchhiahnaa a mi a nih thu a chhannaah hian a tarlang. UDISE hi India ram puma zirlai awm zat chhinchhiahna a ni a, zirlai zat chauh ni lovin sikul hrang hrang dinhmunte chhinchhiahna niin, pawl tina zirlai awm zatte hi chutah chuan chhinchhiah thin a ni.
box
Zirlai awm zat
Pawl Sorkar Private
Pawl 1 21662 14309
Pawl 2 13373 13423
Pawl 3 11941 13446
Pawl 4 11910 13585
Pawl 5 10381 10995
Pawl 6 11812 11151
Pawl 7 11668 10957
Pawl 8 10746 9950
Pawl 9 8425 7430
Pawl 10 7651 7678
Pawl 11 5316 6921
Pawl 12 4042 6469