Sorkarin lakhuihthei \awih hriatpui lo

Budget Session liam taah khan horticulture minister-in sorkarin lakhuihthei hralh theih loh, tawih ral ta a hriatpui loh thu a sawi.
Siaha bialtu Dr K Beichhua zawhna, ziaka chhan chi chhangin horticulture minister Prof Lalnilawma’n lakhuihthei chungchang hi a sawi a, “Lakhuihthei chingtute lakhuihthei hralh theih loh thahnem tak tawih ral ta kha sorkarin a hriatpui em?” tih chu, “Lakhuihthei chingtute’n lakhuihthei hralh theih loh leh tawih ral ta an neih thu hi department-in a hriatpui lo,” tiin a chhang a ni.
“Loneitute thlai/thei hralhna remchan loh avanga tawih ral emaw chhe thei lakah sorkarin ruahmanna a nei,” a ti thung.
Minister hian sawhthing leh aieng thar chhuah beisei zat pawh a sawi a, Aizawl West III bialtu VL Zaithanzama zawhna, ziaka chhan chi chhangin sawhthing quintal 14,83,253.6205 thar chhuah beisei a nih thu leh aieng quintal 78,874.8 thar chhuah beisei a nih thu House a hrilh.
Thlai thar lei chungchangah Dampa bialtu Lalrintluanga Sailo zawhna chhangin agriculture minister PC Vanlalruata’n sawhthing, aieng, hmunphiah leh hmarcha lei turin khaw 648-ah primary society din a nih thu leh, sorkarin membership fee la turin hriattirna a chhuah loh thu te a sawi.
“Sorkar chuan thlai thar hralhna hi Secondary Collection Centre-a phurh thlente chauh a buaipui dawn avangin Primary Society-te chu an thar chhuahna hmun emaw anmahni khua atanga Secondary Collection Centre an phurh thlenna buaipui tura hriattir an ni,” tiin minister chuan a sawi.