South Korea an chak

Zirtawpni zing khan South Korea chuan World Cup 2026-a a match hmasa ber an khel a, si an phurh hmasak hnuin Czech Republic an hneh let. South Korea hian Europe ram an ngam chhunzawm zel.
World Cup kal kawng:
Asia khawmual atanga World Cup khel ngun ber leh semi-final hial pawh lo thleng tawh South Korea hian World Cup 2026 khel tur zawnnaah vawi 16 zet khelin tlawm an nei miah lo. Tlawm nei lo bawk mah se Palestine nen an inhnehtawk teh tlat a, sawisel an hlawh hat. An khingpuite lakah goal 40 an thun laiin goal 8 chiah an chhuah thung a, an chetha viau. An coach Hong Myun-bo hi World Cup 2002 a semi-final an thlen tuma an captain kha a ni a. An player ten an zahin an ringtawk hle. Manager lakah rinna nghat chungin an inlan a, team boruak tha tak an nei.
World Cup leh Euro velah pawh team vangtlang tak ni reng thin Czech Republic hi UEFA atanga World Cup khel tur zawnnaah Group L-ah an awm a, pahnihna an ni. Pahnihna an nih vangin play-off an khelh a ngai. Play-off ah an vannei chho viau. Semi-final-ah Republic of Ireland chu penalty shoot-out ah an hneh a. Final-a an khingpui Denmark pawh penalty-ah an hneh leh bawk a, World Cup khel turin an tling. Vannei taka tling chho an ni a, inbuatsaihna tha tak nen an inlan a, vanneihna chan chhunzawm an inbeisei hle.
Inkhel chu le
Team taima leh thawkrim, khingpuite hmunawl pe duh lova zim tawt zung zung thin South Korea chu Czech Republic lakah hmuhnawm takin an inlan. South Korea hian inkhel tan tirh phat atangin an khingpuite an nawr nghal chat a, an khingpuite zim buaiin an ruahman ang leh an tum angin an inlantir thei lo. Inkhel tir phat atangin Asian team hian rin phak bakin game an thunun.
South Korea tan goal thun hnem ber ni tura goal hnih chauh mamawh tawh Son Hueng-min chuan goal thun theihna hun tha nei bawk thin mah se a vanneih ni a ni lova, goal a thun thei lo. South Korea tan hian Cha Bum-kun chu goal thun hnem ber niin goal 58 a thun a, Son hian goal 56 a thun tling tawh a, World Cup chhungin record siam theihna hun tha a nei. Asian player zingah EPL-a goal 100 chuang thun thei hmasa ber leh EPL a top-score ni thei awmchhun Son hi a hmuhnawm viau a, goal a la thun ngei a rinawm.
Inkhel hmuhnawm takah goal lut a awm theih loh reng hnuin ball chang tlem zawk Czech Republic in an pumraw len an chhawr tangkai ta nge nge. Captain Ladislav Krejc chuan chiang zetin a tauh goal a, minute 59-naah hmahruaina goal a thun.
Ball chang tlem zawkin goal an thun hi inkhel tihmuhnawm zualtuah a tang zui a, South Korea in an si phurh sut tuma tan an khawh a hmuhnawm thei hle. South Korea tan hian Hwang In-Beom chuan minute 67-naah inringtawk zetin a pet goal a, an si phurh a sut.
1-1 a nih hnuin inkhel a hmuhnawm chhunzawm viau a, goal thun tumin an innawr tawn nasa hle. Czechia in tauh goal in goal thun nawn leh mah se offside vangin an goal thun pawm a ni lova, South Korea an him hlauh. Hnufual zawk an nih leh teuh viau hnuin Oh Hyeon-Gyu chuan minute 80-naah hma an hruai letna goal a thun a, goa chhuah teuh viau mah se him hram zelin South Korean hian 2-1 in hnehna an chang a, point thum hlu tak an hmu.
South Korea hian World Cup 2018-ah Germany an hneh nawlh a, 2022-ah Portugal hnehin 2026-ah Czech Republic an hneh zui leh a, World Cup-ah Europe ram lakah a zawnin vawi thum hnehna an chang a, hnuhma tha tak an nei. An elpui lian Czech Republic an hneh a, South Africa hmachhawn zui leh turin South Korea dinhmun a tha viau a, last 32 lut turin dinhmun tha takah an ding. Hetihlai hian an tlawm vangin Zcech Republic dinhmun a duhawm lo viau thung a, an dinhmun a derthawng.