TUNGE AIZAWL KHAWPUI ENKAWL TURA KAN DUH LE?

Last updated Apr 15, 2026 1 0

H.Lalchhuanliana

Aizawl Municipal Corporationa ( AMC) rorel mek MNF term a lo tawp tak avangin April ni 21, 2026 -ah AMC inthlan thar a ni dawn a, pol.party tinte an campaign ngawrh leh ta hle mai. Mi thar lawm luh leh campaign kick off thawm pawh a ri leh ta nuk mai. Candidate te thilphal hun a thleng leh ta a, pawl thenkhat tan lah candidate hnena thil dil hun a ni thin bawk a! Inthlan puan tawh hnu phei chuan Kohhran thleng hian candidate atanga thilpek leh thil dawn hun a ni lo tih hi kan hriata kan fimkhur a pawimawh hle awm e. Inthlan puan atang khan Model Code of Conduct (MCC)hman nghal a ni tih hi kan inhrilh fo a pawimawh a, dan bawhchhia an awm chuan thuneitute hnena thlen hi khua leh tui kan nih anga kan tihtur (duty) tih hre bawk ila. Tun tum AMC inthlang tur hi entawn tlak inthlanna (model election) atan hun remchang leh hun rangkachak niin a lang a, mitinte kan tanrual chuan kan thlentir thei mai ang.
Aizawl khawpui hi mithiam leh changkang zawkte chen tamna hmun a nih avangin kawng engkimah hian zokhaw lam atanga entawn an ni thin. Aizawla thalaite chet dan leh inchei dan chu thingtlang khaw kilkhawr ber thlengin an chet dan leh inchei dan a ni nghal zel thin a ni. Chutiang taka kan entawn leh kan Jerusalem kan lo tih hial thin Aizawl khawpui enkawltu tur kan thlang dawn a, kan inthlan dan hi Aizawl pawn lam atangin min lo thlir reng dawn a ni. Zep nak emaw, kum 2023 MLA election thleng kha chuan kan Aizawl chhung ngeia inthlanna kha thianghlim viau tawhin lang mah se, entawn tlak inthlanna a la tling zo lo a ni. Hmun thenkhatah chuan sum sem leh in luah man leh thil dang inpeksak, last minute hman tangkai leh tangkai loh thawm thlenga hriat tur a awm a ni. Veng thenkhatah phei chuan Iptechei ak an tam ber a nî tiin fiamthu thawhnan an hmang hial a nih kha. Hmeichhiate kha a huangtau-tau an nih thu sawi a awm bawk a, a zia lo hle a ni. Aizawl khawpuiah hian inthlanna thianghlim a awm phawt chuan Mizoram hmun dangah pawh a thianghlim zui mai ang, tan i la teh ang u.
AMC inthlan hi thianghlim leh entawn tlaka siam tur chuan MPF hi an pawimawh berin a rinawm. MPF hi inthlanna thianghlim leh fel a awm theihna tura political party te thuthlung siampuitu an ni a, MPF thawh thatna hmun apiangah inthlanna a fel fai tlangpui thin an ti. MPF chu Kohhran pawl hrang hrang intel khawm an ni a, a tul anga hma la tur member thahnem takte awmna a ni bawk. Hmun tam takah MPF te thahnemngai taka an duty laiin hmun thenkhatah erawh beisei an phak loh thu sawi a awm bawk thin a ni. MPF te hi han tangrual leh zual phei se chuan mi pamham leh pawisak nei lo, sum hmanga inlei tling thin leh inlei tlin tum politician-te hi an chep anga, entawntlak inthlanna a awm mai a beiseiawm e. Chutiang tur chuan tun AMC inthlanna lo awm tur hi entawntlak inthlanna(Model election) lantirna hun tha tak (ber) niin a lang a, Aizawl khawpuia chengte, mi changkang tamna kutah a awm e.
Aizawl khawpui hi a pawimawhin a bika enkawltu Corporator te hi an tan mar lehzual a tul sawt hle a ni. A kum telin mihring kan pung a, kan mamawh pawh a pung zel si a. Lirthei lo pung zelah hian motor park-na hmunin min dawl zo lova, kawngpui sirah kan park dul mai a nih hi. Faina lam ni se kan khawpui luikawr kan la khuh loh avangin bawlhhlawh paihnan kan la hmang zel si a, chu chu kan tui tlan ber Tlawng luiah a luang lut a ni. Ran vulh chungchang pawh hi a hmun (area) azira ngun taka ngaihtuah a tul awm e, mi harsa zawk leh veng laili luah phak lote (urban poor)
dinhmun hi faina leh hriselna lam thlir tel chunga ngaihtuah a ngai tel awm e. AMC hian Aizawl khawpui enkawl tura a tihtur hrang hrang, pawisa a hmuhna leh hmuh zat tur thlengin Dr.C.Lalrampana ziak Vanglaini Ni 5&6, ‘26 chhuakah kan hmu a. Hei bakah hian Pu K.Sapdanga, UD&PA (AMC nodal dept.) changtu Minister-in Street campaigna a sawi angin, Finance Commission leh State sawrkar atanga AMC sum hmuh hi dik taka hman chuan Aizawl khawpui enkawl nan hian a tlem hran lo niin a lang.
Aizawl city huam chhungah MLA bial sawmpakhat leh AMC Ward 19 a awm a, inrawn tlangin hna thawh tur fel takin (systematic) insem thlap se, tun ai hian kan Aizawl khawpui hi a fel fai zawk ngei ang. State-a rorel lai leh AMC a rorel apiangte hi tang tlangin chan insem se, kan khawpui chhunga luikawr khuh vek hi thil harsa niin a lang lo a ni. Heta tang mai pawh hian State sawrkar leh AMC tan tlan a tulzia a lang awm e. Tunah hian kan State-ah ZPM in rorelna an chan mek laiin AMC (kal ta) ah khan MNF in rorelna an chang thung a ni. AMC hi mahnia inrelbawlna hranpa nei an nih avangin State sawrkar tan pawh duh ang anga zu thunun theih lohna chin a awm awm e, hei vang tak hian thawh hona tha a pawimawh a ni. Aizawl khawpui enkawl kawngah tal hi chuan party bil rilru dah bovin State sawrkar leh AMC hi thawk ho thin se a duhawm hle mai. State-a rorel lai apiang hian rorel lai thawhpui thei thlan chhuah a pawimawh thu hi an au-hla a ni zel a, ZPM pawh hian chu chu an au-hla a ni mek a. MNF pawh khan State-a rorelna an chan laiin chu tho chu an au-hla niin, lungthu pathum tehkhin nan an hmang a nih kha.
ZPM hian AMC-ah sawrkarna an la chang ve lo va, tun AMC kal taah khan Corporator paruk an nei a. Tuna an Campaign au-hlaah pawh State-a rorel lai thawhpui thei tur an nih avanga remchanna an neih bik thu leh Aizawl tha zawk an siam theih tur thu a ni ber a. ZPM hruai sawrkarin kum hnih lek chhunga a hnathawh tam leh that thu an tlangaupui tam a, chu chu party dangte aia an that zawkna tur hmanrua pawh niin an sawi. He an campaign au-hla hi tuna ZPM kaihhruai sawrkar hnathawh atangin mipuiin an teh mai tur niin a lang e. MNF pawhin Mizoram leh Aizawl enkawl tura an that ber thu an tlangaupui thung a, anni hi term hnih lai AMC-a rorelna lo chang tawh an ni a, hma tam tak lo la tawhin an hnathawh dan chu Aizawl mipuiten kan hre tlangpui awm e. Congress party hruai hi AMC-a rorelna bul tantu an ni a, AMC kal taah khan Corporator pahnih an nei a. Tun tumah hian an party hruaitu lian, MPCC Treasurer hovin an rawn thawk chhuak a, an bul lo tan dan leh an hna tawh atanga teh tur an ni bawk ang. BJP pawhin seat thenkhat an chuh dawn a, anni hian Central lam chakna khu hai chhuak zo tak maw le.
Ka thuthang hriat lawmawm lo:- A hua hua chu an ni mai aw!! Social media nge article ka hre ta mai lo, AMC enkawl Parking fee khawntute phenah Councillor-te an biru kuk tih lam hawi hi ka chhiar a, in hmu ve thovin ka ring. Hei baka ka thuthang hriat chu- Political party pakhat chuan motor parking hmun an neih thu leh parking fee chu party fund-ah a luh thu a ni a, tu mimal hmingin emaw parking hmun an nei niawm tak a ni. Chu mai a la ni lo, AMC-a thawk mi thenkhat, parking fee khawntute hnena an ID Card entira parking fee pe ngai lo, fee khawntute pawhin an nin em em an awm tih thu an sawi hi ka hre leh ta zel bawk a, a va hahthlak ngat ngat ve aw!! Kan Journalist bengvar tak takte hian an la hre lo nge ka thu hriat hi a dik lo zawk tih min ngaihtuahtir hial a ni. Corporator-Cum Parking fee khawntu te, Political party- cum parking fee khawnna hmun neitute hi kan lo nei reng em ni, ngaihtuah a va tithui ve le, thu thang dik lo ni hlauh se ka va ti ve le !!
AMC inthlanah hian kan State khawpui ber enkawltu tur kan thlang dawn a, Aizawla chengte hi chu kawng hrang hrangin changkang zawk tura beisei leh entawn an ni kan tih kha . Chuvangin tun tuma AMC inthlang tur hi Aizawl khaw pawn lam atanga entawn tlak leh felfai inthlanna ni turin Aizawl khawpuia chengte mawh a ni e. Statea rorel lai party candidate te ngei hi Aizawl khawpui enkawl turin an tha ang i ti nge, AMC chu mahnia rorelna hran nei an ni tho a, rorel lai party kher thlan a ngai lo ve i ti dawn? I kutah a awm e.