Spurs an chak zel

October 28, Thawh leh zing khan NBA 2025-26 regular season khelh chhunzawm a ni a, season bul tan tha San Antonio Spurs an chetha tluang zel. Spurs hian an khingpui Toronto Raptors chu point 121-103 in an hneh a, vawi li an chak zawn chiah. Spurs an chak rual hian City Thunder pawhin hnehna an chang ve bawk.
Season tharah vawi thum chak zawn tawh San Antonio Spurs hian Frost Bank Center-ah Toronto Raptors an hmachhawn. An mikhual lakah bul an tan tha viau a, quarter hmasa berah point 41 zet thawkchhuakin, point 12 in an chungnung nghal. Quarter hnihnaah khel tha chhunzawmin point 7 in an chungnung zui leh a, point 19-a hmahruai chungin chawlhlawk an hmang.
Chawlhlawk hnu lamah Toronto Raptors in hnehna chan let ngei tumin tan an khawh a, inkhel hmuhnawm zawk an lantir. Raptors hi quarter thumnaah point khatin an chungnung a, quarter hnuhnung berah erawh point khatin an hnufual ve leh thung a, mual neitu Sun Antonio Spurs lakah hian point 121-103 in an tlawm zui ta a ni.
NBA season tharah San Antonio Spurs an khel tha tluang viau a, vawi li an chak zawn ta chiah. Spurs hi kum 2017-18 hnu lamah season thara an game hmasa paliah an chak zawn thei ta miah lova, 2025-26-ah erawh vawi li an chak zawn ta nawlh thung. Spurs tan hian season thara vul tak Victor Wembanyama chuan point 24 a thawkchhuak a, a chetha leh viau. Wembanyama hi NBA Game hmasa pathumah point 100 thawkchhuak a, block vawi 19 nei tling thei record siam hlim hlawt kha a ni.
Thawhlehni zinga inkhel dangah Oklahoma City Thunder pawhin hnehna an chang a, point 101-94 in an khingpui Dallas Maverick an hneh. He inkhelah hian Shai Gilgeous-Alexander chuan point 23 a thawkchhuak a, team nen hma lam an pan zel.