Sri City-a thawk turin Mizo 10

Sri City-a thawk turin Mizo 10
Andhra Pradesh Sri City-a Mizo thalai hna thawk tura thlan mi 10 chu Zirtawpni khan Mizoram Youth Commission chairman Malsawmzuala Ralte chuan a kawm.
RK Enterprise (Daikin AC Manufacturing) Sri City-a hna thawhna tur hi Mizoram larsap Dr Hari Babu Khambampati leh MYC chairman hian a hmunah an lo zuk enfiah hmasa tawh a, MYC leh RK Enterprise hian thawhdunna thuthlung (MoU) siamin, Mizo thalaite hi thawn thlak an ni dawn a. Thalai 100 chuang mamawh ni mah se, tun tumah hi chuan a hmasa ber atan mi 10 tirh phawt an ni.
MYC chairman chuan hnathawka kal turte chu chhel turin a chah a. An awmna hmuna an chetvelna leh awmdan apiang chu hnamdangte hmuhah Mizo awm dan, tih a nih zel dawn avangin Mizo hnam aiawh an ni tih hria a, nun uluk turin a fuih. Mizo thalaite tana kawng sattu an nih avangin an thalai puite tana awlsam leh tha zawka kawng sialsaktu ni turin a fuih bawk.
Hnathawka kal turte hian November 11-ah Aizawl chhuahsanin an hnathawhna tur an pan ang a. Guwahati thlengin MYC official-ten an thlah dawn a ni.